கேரள மாநிலம் கொல்லம் பகுதியில் நடந்த இந்த கொடூர சம்பவம், வரதட்சணை கொடுமையின் உச்சகட்டமாகப் பார்க்கப்படுகிறது. கடந்த 2013-ம் ஆண்டு சந்துலால் என்பவருக்கும் துஷாரா என்ற பெண்ணுக்கும் திருமணம் நடந்துள்ளது. திருமணத்தின் போது 25 பவுன் நகை மற்றும் 5 லட்சம் ரூபாய் பணம் கொடுக்கப்பட்ட நிலையிலும், கூடுதல் வரதட்சணை கேட்டு சந்துலாலும் அவரது பெற்றோரும் துஷாராவைத் தொடர்ந்து சித்திரவதை செய்துள்ளனர்.

இந்த கொடுமையின் காரணமாக 2018-ல் துஷாரா உயிரிழந்தார். அவரது மரணத்தில் மர்மம் இருப்பதாகப் பெற்றோர் புகார் அளித்ததைத் தொடர்ந்து நடத்தப்பட்ட உடற்கூறாய்வில், அவர் பட்டினி போட்டே கொல்லப்பட்டது வெளிச்சத்திற்கு வந்தது.
​
உயிரிழக்கும் போது துஷாராவின் உடல் எடை வெறும் 21 கிலோவாக மட்டுமே இருந்தது மருத்துவர்களையே அதிர்ச்சியில் ஆழ்த்தியது. பல நாட்களாக உணவு அளிக்காமல் அவரை ஒரு அறையில் அடைத்து வைத்து மாமியார் மற்றும் கணவர் கொடுமைப்படுத்தியது நீதிமன்றத்தில் நிரூபிக்கப்பட்டது.

இந்த வழக்கை விசாரித்த கொல்லம் நீதிமன்றம், இது ஒரு கொடூரமான கொலை என்று கூறி, கணவர் சந்துலால் மற்றும் அவரது தாயார் கீதாவிற்கு 2025-ம் ஆண்டில் ஆயுள் தண்டனை வழங்கி அதிரடி தீர்ப்பளித்துள்ளது. வரதட்சணை கொடுமைக்கு எதிராக வழங்கப்பட்ட இந்த தீர்ப்பு சமூகத்தில் ஒரு முக்கிய மைல்கல்லாகக் கருதப்படுகிறது.