கோவை மாவட்டம் பொள்ளாச்சியில், அதிமுக நகர இளைஞரணிச் செயலாளரான செந்தில்குமார் என்பவர் கந்துவட்டி கேட்டு மிரட்டிய புகாரில் கைது செய்யப்பட்டுள்ளார். பொள்ளாச்சி ஜோதி நகரைச் சேர்ந்த தீபா என்பவர், நான்கு மாதங்களுக்கு முன்பு செந்தில்குமாரிடம் ஒரு லட்ச ரூபாய் கடன் வாங்கியிருந்தார். இதற்காக, அவர் மாதம் ரூ.10,000 கந்துவட்டி கட்ட வேண்டும் என்று செந்தில்குமார் நிர்பந்தித்ததாகத் தெரிகிறது. தீபா கடந்த மூன்று மாதங்களாக முறையாக வட்டி செலுத்தி வந்துள்ளார். ஆனால், இந்த மாதம் குடும்பச் சூழ்நிலை காரணமாக வட்டிப் பணத்தை செலுத்த முடியவில்லை. இதனால், செந்தில்குமார், தீபாவை தொலைபேசியில் தகாத வார்த்தைகளால் திட்டியதோடு, பணத்தைத் திருப்பிக் கேட்டு தொடர்ந்து மிரட்டியுள்ளார்.

​செந்தில்குமாரின் மிரட்டல் தாங்காமல், பாதிக்கப்பட்ட தீபா கிழக்கு காவல் நிலையத்தில் புகார் அளித்தார். புகாரின் அடிப்படையில், போலீசார் செந்தில்குமார் மீது கந்துவட்டி தடுப்பு சட்டம் மற்றும் பெண் வன்கொடுமை சட்டத்தின் கீழ் வழக்குப்பதிவு செய்து அவரைக் கைது செய்து சிறையில் அடைத்தனர். அதிமுக பிரமுகர் ஒருவர் கந்துவட்டி புகாரில் கைது செய்யப்பட்ட இந்தச் சம்பவம் பொள்ளாச்சியில் பரபரப்பை ஏற்படுத்தியுள்ளது. தமிழகத்தில் கந்துவட்டி கொடுமையைத் தடுக்கும் வகையில் அரசு புதிய சட்டங்களை இயற்றியுள்ள நிலையில், இதுபோன்ற சம்பவங்கள் தொடர்ந்து வருவது குறிப்பிடத்தக்கது.