தமிழக அரசியல் களத்தில் எப்போதும் பரபரப்பாகப் பேசப்படும் தலைவர்களில் ஒருவரான திமுக முன்னாள் அமைச்சர் செந்தில் பாலாஜி வீட்டில், லஞ்ச ஒழிப்புத் துறை அதிகாரிகள் திடீர் சோதனையில் ஈடுபட்டனர். இந்தச் சோதனை சம்பவம் அரசியல் வட்டாரத்திலும், பொதுமக்கள் மத்தியிலும் பெரும் அதிர்வலைகளை ஏற்படுத்திய நிலையில், சோதனைக்குப் பிறகு செந்தில் பாலாஜி வெளியிட்ட அறிக்கை தற்போது வைரலாகி வருகிறது.
லஞ்ச ஒழிப்புத் துறை காவல்துறையினரின் இந்த நடவடிக்கைக்குத் தாம் முழுமையான ஒத்துழைப்பை வழங்கியதாக செந்தில் பாலாஜி தெரிவித்துள்ளார். அதிகாரிகள் கேட்ட அனைத்துக் கேள்விகளுக்கும் உரிய விளக்கங்களை அளித்ததாகவும், அவர்களின் சோதனை நடவடிக்கைகளுக்கு எந்தவித தடங்கலும் இன்றி முழுமையாக ஒத்துழைப்பு கொடுத்ததாகவும் அவர் சுட்டிக்காட்டியுள்ளார்.
மேலும், தன் மீது சுமத்தப்பட்டுள்ள டாஸ்மாக் தொடர்பான வழக்குகள் ஏற்கனவே உச்ச நீதிமன்றத்தில் நிலுவையில் இருந்து வருவதை நினைவுகூர்ந்த அவர், இதுபோன்ற சோதனைகளைத் தாம் தைரியமாக எதிர்கொண்டு சட்டப் போராட்டத்தின் மூலம் வெற்றி பெறுவேன் என்று உறுதியளித்துள்ளார். “மடியில் கனமில்லை, அதனால் எனக்கு வழியில் எந்தப் பயமும் இல்லை” என்றும் அவர் மிகக் கெத்தாகக் குறிப்பிட்டுள்ளார்.
சோதனையின் முடிவில் தனது அறையிலிருந்து எந்தவொரு முறைகேடான ஆவணங்களும் அதிகாரிகளால் கைப்பற்றப்படவில்லை என்றும் செந்தில் பாலாஜி தெளிவுபடுத்தியுள்ளார். அரசியல் ரீதியாகத் தன் மீது தொடுக்கப்படும் எந்தவொரு சவாலையும் சட்டரீதியாகச் சந்தித்து அதில் இருந்து மீண்டு வருவேன் என்ற அவரது வார்த்தைகள், அவரது ஆதரவாளர்கள் மத்தியில் பெரும் உற்சாகத்தை ஏற்படுத்தியுள்ளது.
