சென்னையில் கடந்த ஜனவரி 24-ஆம் தேதி, வேலை தேடி வந்த பிகார் மாநிலத்தைச் சேர்ந்த கௌரவ் குமார், அவரது மனைவி முனிதா குமாரி மற்றும் அவர்களது 2 வயது குழந்தை பிர்மணி குமார் ஆகியோர் கொடூரமாகக் கொலை செய்யப்பட்டனர். கௌரவ் குமார் மற்றும் குழந்தையின் உடல்கள் ஏற்கனவே மீட்கப்பட்ட நிலையில், முனிதா குமாரியின் உடல் மட்டும் கிடைக்காமல் இருந்தது. அந்தப் பெண்ணின் உடலை ஒரு சாக்கு மூட்டையில் கட்டி குப்பைத் தொட்டியில் வீசியதாகக் கைதானவர்கள் கொடுத்த வாக்குமூலத்தின் அடிப்படையில், அந்த உடல் மாநகராட்சி குப்பை லாரி மூலம் பெருங்குடி குப்பைக் கிடங்கிற்குச் சென்றிருக்கலாம் எனப் போலீசார் சந்தேகித்தனர்.

​இதையடுத்து, கடந்த மூன்று நாட்களாகப் பெருங்குடி குப்பைக் கிடங்கில் 50-க்கும் மேற்பட்ட போலீசார் மற்றும் 25-க்கும் மேற்பட்ட மாநகராட்சி ஊழியர்கள் எனப் பெரிய படையே திரண்டு, பொக்லைன் இயந்திரங்கள் உதவியுடன் பல டன் குப்பைகளைத் தோண்டித் தேடினர். கடும் போராட்டத்திற்குப் பிறகு, இன்று (ஜனவரி 30, 2026) முனிதா குமாரியின் உடல் அழுகிய நிலையில் கண்டெடுக்கப்பட்டது. நண்பர்களே வஞ்சகமாகக் கொலை செய்த இந்தச் சம்பவம், சென்னையில் பெரும் பரபரப்பை ஏற்படுத்தியுள்ளது.