தனது சொந்த மகளையே கடந்த பத்து ஆண்டுகளுக்கும் மேலாகத் தொடர்ந்து பாலியல் வன்கொடுமை செய்து வந்த கொடூரக் குற்றச்சாட்டுக்கு உள்ளான தந்தை ஒருவரின் ஜாமீன் மனுவை டெல்லி உயர் நீதிமன்றம் அதிரடியாகத் தள்ளுபடி செய்துள்ளது. தற்போது 17 வயதாகும் அந்தப் பெண், தனக்கு 6 வயது இருக்கும் போதிலிருந்தே தந்தை இந்த விபரீதச் செயலில் ஈடுபட்டு வந்ததாகக் கடந்த ஜனவரி மாதம் காவல்துறையிடம்  புகார் அளித்துள்ளார்.

இந்தத் தொடர் அதிர்ச்சிகரமான சம்பவங்களால் பாதிக்கப்பட்ட அந்தச் சிறுமி, தற்போது கடுமையான மன உளைச்சல் மற்றும் ‘டிசோசியேட்டிவ் ஐடென்டிட்டி டிஸார்டர்’ (DID), ‘போஸ்ட் ட்ராமடிக் ஸ்ட்ரெஸ் டிஸார்டர்’ (PTSD) போன்ற தீவிர மனநலப் பாதிப்புகளுக்கு ஆளாகியுள்ளார். நீதிமன்றத்தில் வாதாடிய தந்தை தரப்பு வழக்கறிஞர், சிறுமிக்கு மனநலப் பாதிப்பு இருப்பதால் அவரது வாக்குமூலத்தை நம்ப முடியாது என்றும், மனைவியுடன் இருக்கும் குடும்பத் தகராறு காரணமாகத் தவறாகப் பழிவாங்கப்படுகிறார் என்றும் கூறி ஜாமீன் கோரினார்.

இந்த வாதங்களைக் கடுமையாக நிராகரித்த நீதிபதி ஸ்வர்ணா காந்தா சர்மா, பாதிக்கப்பட்ட சிறுமியின் மனநலப் பாதிப்பைக் குற்றவாளி தப்பிப்பதற்கான ஆயுதமாகப் பயன்படுத்த முடியாது என்று திட்டவட்டமாகக் கூறினார். சிறுமிக்கு ஏற்பட்டுள்ள இந்த மனநலப் பாதிப்புகள், அவர் கடந்த 10 ஆண்டுகளுக்கும் மேலாகத் தொடர்ந்து அனுபவித்து வந்த கொடூரமான சித்திரவதையின் வெளிப்பாடே தவிர, அவரது குற்றச்சாட்டுகளைப் பொய்யாக்குவதற்கான காரணம் அல்ல என்று நீதிமன்றம் தெளிவுபடுத்தியுள்ளது.

மேலும், இத்தனை ஆண்டுகள் அந்தப் பெண் மௌனமாக இருந்ததற்குத் தந்தையின் மிரட்டலும், பயமும், ஒரு மைனர் பெண்ணாகத் தந்தையின் கட்டுப்பாட்டில் இருந்த சூழ்நிலையுமே காரணம் என்றும் நீதிபதி சுட்டிக்காட்டினார். தந்தை ஒரு முக்கியப் பொறுப்பில் இருந்து கொண்டு இந்த அநீதியைச் செய்திருப்பதாலும், அவர் வெளியே வந்தால் சிறுமியையும் மற்ற சாட்சிகளையும் மிரட்ட அதிக வாய்ப்பு இருப்பதாலும், அவருக்கு ஜாமீன் வழங்க முடியாது எனக் கூறி அவரது மனுவை நீதிமன்றம் முழுமையாகத் தள்ளுபடி செய்து உத்தரவிட்டது.