உடலைச் சீராகக் கட்டமைப்பது, முக்கிய உறுப்புகளைப் பாதுகாப்பது மற்றும் கால்சியம் சத்தைச் சேமித்து வைப்பது என மனித உடலின் ஒட்டுமொத்த நலனுக்கும் எலும்புகளே முதன்மை ஆதாரமாகத் திகழ்கின்றன. பெண்களைப் பொறுத்தவரை, இளமைப் பருவத்தில் எலும்புகள் வலுவாக இருந்தாலும், 30 வயதைக் கடந்த பிறகு அவற்றில் உள்ள கால்சியத்தின் அளவு படிப்படியாகக் குறையத் தொடங்குகிறது. இதனால் பின்னாட்களில் ஏற்படும் எலும்பு சார்ந்த பாதிப்புகளைத் தவிர்க்க ஆரம்பக் கட்டத்திலேயே கவனம் செலுத்துவது அவசியமாகிறது.

உலகளவில் மற்ற நாட்டுப் பெண்களோடு ஒப்பிடுகையில், இந்தியப் பெண்களுக்கு எலும்பின் அடர்த்தியும் வலிமையும் குறைவாகவே இருப்பதாகப் ஆய்வுகள் தெரிவிக்கின்றன. பெண்களுக்கு மாதவிடாய் சுழற்சியைக் கட்டுப்படுத்தும் ஈஸ்ட்ரோஜன் ஹார்மோன்தான் எலும்புகளின் வளர்ச்சிக்கும் உறுதிகட்கும் காரணமாக உள்ளது. இந்த ஹார்மோன் சுரப்பு குறையும்போது மாதவிடாய் நிாைவுபெறும் சூழல் ஏற்பட்டு, எலும்புகளின் பலம் வெகுவாகக் குறைகிறது. இந்தியப் பெண்களுக்கு இது ஒப்பீட்டளவில் விரைவாகவே நடப்பதால் எலும்பு முறிவு அபாயமும் அதிகரிக்கிறது.

அன்றாட உணவுப் பழக்க வழக்கங்களும் பெண்களின் எலும்புப் பலவீனத்திற்கு முக்கியக் காரணமாக அமைகின்றன. பொதுவாகவே எலும்புகளுக்கு ஊட்டம் தரும் சத்து உணவுகளைப் பெண்கள் குறைவாகவே எடுத்துக்கொள்கிறார்கள். ஆண்களுடன் ஒப்பிடும்போது கால்சியம் நிறைந்த பால், தயிர் போன்ற பொருட்களையோ அல்லது புரதம் நிறைந்த இறைச்சி, மீன், முட்டை ஆகியவற்றையோ பெண்கள் தங்கள் உணவில் போதிய அளவில் சேர்த்துக்கொள்வதில்லை.

எலும்பு ஆரோக்கியத்தைப் பேணிப் பாதுகாக்கத் தவறாமல் உடற்பயிற்சி செய்வதோடு, சரிவிகித உணவு முறையைப் பின்பற்றுவதும் அவசியமாகும். கால்சியம் மற்றும் வைட்டமின் டி சத்துக்கள் நிறைந்த உணவுகளைத் அன்றாடம் உட்கொள்வது எலும்புகளின் தேய்மானத்தைத் தடுக்க உதவும். மேலும் மது, புகைப்பிடித்தல் போன்ற தீய பழக்கவழக்கங்களைத் தவிர்ப்பதும் எலும்புகளின் ஆயுளை அதிகரிக்கச் செய்யும்.

உணவு மூலம் மட்டுமே உடலுக்குத் தேவையான முழு கால்சியத்தையும் பெற முடியாத சூழலில், மருத்துவர்கள் கால்சியம் மாத்திரைகளைப் பரிந்துரைப்பதுண்டு. இருப்பினும், சுய மருத்துவம் செய்வதைத் தவிர்த்து, மருத்துவ ஆலோசனையின் பேரில் மட்டுமே இத்தகைய மாத்திரைகளை எடுத்துக் கொள்ள வேண்டும். சரியான விழிப்புணர்வும் முறையான பராமரிப்பும் இருந்தால் மட்டுமே பெண்கள் தங்களின் எலும்பு ஆரோக்கியத்தை ஆயுள் முழுவதும் பலமாக வைத்திருக்க முடியும்.