தஞ்சாவூரில் நடைபெற்ற திமுக முக்கிய நிர்வாகியின் குடும்ப திருமண விழாவில் அக்கட்சியின் இளைஞரணிச் செயலாளர் உதயநிதி ஸ்டாலின் கலந்துகொண்டு பேசினார். தேர்தல் முடிவுகள் வெளியானதற்குப் பிறகு, திமுக தலைவர் மு.க.ஸ்டாலின் பங்கேற்கும் முதல் பொது நிகழ்ச்சி இது என்பது குறிப்பிடத்தக்கது. விழாவில் உதயநிதி ஸ்டாலின் பேசியதாவது,

திருவாரூர், திருச்சி மற்றும் தஞ்சாவூர் ஆகிய டெல்டா மாவட்டங்கள் ஒருங்கிணைந்து நடத்தும் இந்தத் திருமண விழா, கழகத்தின் எழுச்சி விழாவாகக் காட்சியளிக்கிறது. அரசியல் சூழல்கள் எப்படி மாறினாலும், டெல்டா பகுதி மக்கள் எப்போதுமே திராவிட முன்னேற்றக் கழகத்தின் பக்கம்தான் என்பதை மீண்டும் ஒருமுறை நிரூபித்துக் காட்டியுள்ளனர்.

மறைந்த முன்னாள் நிர்வாகி பூண்டி கலைச்செல்வனின் குடும்பத்தினர் இன்றுவரை கட்சியின் வளர்ச்சிக்காகக் களத்தில் நின்று உழைப்பது பெருமைக்குரியது. முத்தமிழறிஞர் கலைஞர் குறிப்பிட்டது போல, திமுக என்பது வெறும் தேர்தல் அரசியல் கட்சி மட்டுமல்ல; அது ஒரு சமுதாய இயக்கம். தேர்தலில் வெற்றி, தோல்விகள் ஏற்படுவது இயல்பான ஒன்றுதான். அது மற்ற கட்சிகளைப் பாதிக்கலாமே தவிர, மக்கள் இயக்கமான திமுகவை எதுவும் செய்யாது.

 நாம் தற்காலிகமாகத் தேர்தல் களத்தில் வெற்றி வாய்ப்பை இழந்திருக்கலாமே தவிர, கொள்கை ரீதியான அரசியலில் திமுகவை யாராலும் வீழ்த்த முடியாது. எனவே, தொண்டர்கள் சோர்வடையாமல் எப்போதும் போல தங்களது மக்கள் பணியைத் தொடர வேண்டும். ஆளுங்கட்சியாக இருந்தபோது மட்டுமன்றி, தற்போது எதிர்க்கட்சியாகச் செயல்பட உள்ள நிலையிலும், நமக்கு வாக்களித்தவர்கள் மற்றும் வாக்களிக்காதவர்கள் என ஒட்டுமொத்த தமிழக மக்களுக்காகவும் நாம் தொடர்ந்து உழைப்போம்.

தமிழ்நாட்டிற்கு வரும் ஆபத்துகளைத் தடுத்து நிறுத்தி, மாநில உரிமைகளை நாம் நிச்சயம் மீட்டெடுப்போம். ஆட்சிப் பொறுப்பேற்ற இந்த 10 நாட்களிலேயே புதிய அரசின் உண்மையான முகத்தை இளைஞர்களும், பெண்களும் உணரத் தொடங்கிவிட்டனர். போகப் போக இன்னும் பல உண்மைகள் வெளிச்சத்திற்கு வரும். நமது தலைவர் சொல்வது போல, சூரியன் ஒருபோதும் மறையாது; அது மீண்டும் உதிக்கும், அதன் ஒளியில் தமிழ்நாடு மறுபடியும் செழிப்படையும் என்றார்.