மறைந்த திமுக தலைவர் கருணாநிதிக்கு மெரினாவில் இடம் ஒதுக்கீடு செய்தது தொடர்பான சர்ச்சைக்கு, அதிமுக பொதுச்செயலாளர் எடப்பாடி பழனிசாமி தற்போது மிகத் தெளிவான மற்றும் அதிரடியான விளக்கத்தை அளித்துள்ளார். “முன்னாள் முதல்வர் காமராஜர் மறைந்தபோது, அவருக்கு மெரினாவில் இடம் கேட்டதற்கு, ‘முதல்வராக இருந்து இறந்தால் தான் இடம் கொடுக்க முடியும்’ என்று அன்றைய முதல்வர் கருணாநிதி மறுத்தார். அதேபோல் எம்ஜிஆரின் மனைவி ஜானகி அம்மாள் மறைந்தபோதும் அவருக்கு மெரினாவில் இடம் தர திமுக அரசு முரண்டு பிடித்தது” என்று பழைய சம்பவங்களை இபிஎஸ் சுட்டிக்காட்டியுள்ளார்.
இதனை அடிப்படையாக வைத்தே, கலைஞர் மறைந்தபோது அவர் முன்னரே வகுத்த அந்த விதியைக் குறிப்பிட்டு, அவருக்குக் கிண்டியில் இடம் தருவதாகக் கூறினோம் என்று எடப்பாடி பழனிசாமி விளக்கியுள்ளார். “காமராஜருக்கு ஒரு நியாயம், கலைஞருக்கு ஒரு நியாயமா?” என்று கேள்வி எழுப்பியுள்ள அவர், இதில் எந்தப் பழிவாங்கும் உணர்ச்சியும் இல்லை, மாறாக முன்னுதாரணங்களைச் சுட்டிக்காட்டியே அதிமுக அரசு செயல்பட்டதாகக் குறிப்பிட்டுள்ளார். தமிழக அரசியலில் நீண்ட நாட்களாக விவாதிக்கப்பட்டு வரும் மெரினா இட ஒதுக்கீடு விவகாரத்தில், இபிஎஸ்ஸின் இந்த ‘நேரடித் தாக்குதல்’ அரசியல் வட்டாரத்தில் பெரும் பரபரப்பை ஏற்படுத்தியுள்ளது.
