தகவல்தொழில்நுட்பத் துறையில் பணிபுரியும் ஒரு பெண், தனது மாமனாரை அடிக்கடி கேலி செய்தும், அவரது கௌரவத்தை பாதிக்கும் வகையில் கிண்டல் செய்தும் வந்துள்ளார். தனது தந்தைக்கு இழைக்கப்படும் இந்த அவமானத்தை சகித்துக்கொள்ள முடியாத கணவர், தனது மனைவியின் இத்தகைய போக்கைக் கண்டித்து ஒரு அதிரடி முடிவை எடுத்துள்ளார்.

மேலும் மனைவியின் அகங்காரத்திற்கு அவரது வேலையும், அதிக சம்பளமுமே காரணம் என்று கருதிய கணவர், அவரை வீட்டை விட்டு வெளியேற்றியதுடன், வேலையை ராஜினாமா செய்தால் மட்டுமே மீண்டும் வீட்டிற்குள் நுழைய முடியும் என்று கடுமையான நிபந்தனையை விதித்துள்ளார்.

இந்த விவகாரம் தற்பொழுது குடும்ப நல நீதிமன்றத்திற்குச் சென்றுள்ளது. அங்கு தம்பதியினருக்கு இடையே சமரசம் செய்ய மேற்கொள்ளப்பட்ட முயற்சிகளின் போது, கணவர் தனது பிடிவாதத்தில் உறுதியாக இருந்தார். தனது தந்தை தனது வீட்டில் மரியாதையுடன் நடத்தப்பட வேண்டும் என்றும், மனைவியின் வேலைதான் அவரை இவ்வளவு ஆணவமாக நடந்துகொள்ளத் தூண்டுகிறது என்றும் அவர் வாதிட்டார்.

இந்நிலையில் மறுபுறம், அந்த பெண் தனது வேலையை விடத் தயாராக இல்லை என்றும், இது தனது தனிப்பட்ட சுதந்திரம் என்றும் கூறி வருகிறார். குடும்ப கௌரவம் மற்றும் வேலைக்கு இடையேயான இந்த மோதல் சமூக வலைதளங்களில் விவாதத்தை ஏற்படுத்தியுள்ளது.