மத்திய கிழக்கில் ஈரான் மற்றும் அமெரிக்காவுக்கு இடையே நிலவும் உச்சகட்ட பதற்றம், பாகிஸ்தானின் வெளியுறவுக் கொள்கையை பெரும் நெருக்கடிக்கு உள்ளாக்கியுள்ளது.

இரு நாடுகளுக்கும் இடையே ‘மத்தியஸ்தராக’ செயல்பட நினைத்த பாகிஸ்தானின் திட்டம் தற்போது பலவீனமடைந்து வருவதாகவும், அந்நாடு சர்வதேச அளவில் ஒரு சிக்கலான சூழலில் சிக்கியுள்ளதாகவும் புவிசார் அரசியல் நிபுணர்கள் எச்சரிக்கின்றனர்.

பாகிஸ்தானின் தர்மசங்கடம்:

பஹ்ரைன் மற்றும் குவைத்தில் உள்ள அமெரிக்கத் தளங்கள் மீது ஈரான் தாக்குதல் நடத்தியதையடுத்து, அமெரிக்கா பதிலடி கொடுத்துள்ளது. இதனால் மத்திய கிழக்கு மீண்டும் போர்க்களமாக மாறியுள்ளது.

ஈரானுடன் நல்லுறவையும், அமெரிக்காவுடன் ராணுவ மற்றும் பொருளாதார ரீதியான பிணைப்பையும் கொண்டுள்ள பாகிஸ்தான், இந்தச் சூழலில் யாரை ஆதரிப்பது என்ற இக்கட்டான நிலைக்குத் தள்ளப்பட்டுள்ளது.

சவுதி அரேபியா மீதான ஹூதி கிளர்ச்சியாளர்களின் தாக்குதல்களை பாகிஸ்தான் கண்டித்தாலும், அதன் தூதரக முயற்சிகள் பெரிய மாற்றத்தை ஏற்படுத்தவில்லை.

‘பலி ஆடாக’ மாறும் அபாயம்:

மத்திய கிழக்கு விவகாரங்களில் பாகிஸ்தானின் மத்தியஸ்தம் தோல்வியடைந்தால், சர்வதேச அரசியலில் அந்நாடு ஒரு ‘பலி ஆடாக’ மாற்றப்படலாம் என்று புவிசார் அரசியல் நிபுணர் மைக்கேல் குக்கெல்மேன் எச்சரித்துள்ளார்.

அமைதிப் பேச்சுவார்த்தைகள் தோல்வியடைந்தால், அதன் முழுப்பொறுப்பையும் பாகிஸ்தான் சுமக்க வேண்டியிருக்கும் என்பதுடன், தேவையற்ற சிக்கல்களில் அந்நாடு இழுக்கப்படலாம் என்ற அச்சம் எழுந்துள்ளது.

இஸ்லாமாபாத் ஒப்பந்தத்தின் பலவீனம்:

இரு தரப்பையும் பேச்சுவார்த்தை மேசைக்குக் கொண்டுவர பாகிஸ்தான் மேற்கொண்ட ‘இஸ்லாமாபாத் ஒப்பந்தம்’ தற்போது காகிதத்தில் மட்டுமே உள்ள ஒரு தற்காலிகத் தீர்வாக மாறியுள்ளது.

இது நீண்டகால அமைதிக்கான அடித்தளத்தை உருவாக்கவில்லை, மாறாக தற்காலிகமாக மோதல்களை ஒத்திவைக்க மட்டுமே உதவியது என்று நிபுணர்கள் சுட்டிக்காட்டுகின்றனர்.

ஈரானைப் பொறுத்தவரை, ஹார்முஸ் நீரிணை மீதான கட்டுப்பாடு என்பது ஒரு போர்க்கருவி மட்டுமல்ல, அது அவர்களின் தந்திரோபாயச் சொத்து. எனவே, அமெரிக்கா மற்றும் ஈரானுக்கு இடையிலான அதிகார சமநிலை மாறாதவரை, எந்தவொரு மத்தியஸ்தரும் பெரிய மாற்றத்தை ஏற்படுத்த முடியாது என்பதே நிதர்சனம்.

குறுகி வரும் வாய்ப்புகள்:

தற்போதைய சூழலில் பாகிஸ்தானுக்குச் சுதந்திரமாகச் செயல்படுவதற்கான வாய்ப்புகள் மிகக் குறைவு. ஈரான் தனது கட்டுப்பாட்டை உறுதிப்படுத்த முனைப்புடன் இருப்பதாலும், இரு நாடுகளும் மோதல் போக்கில் இருப்பதாலும், பாகிஸ்தான் இந்தத் பதற்றத்தைத் தணிப்பதில் பெரிய தாக்கத்தை ஏற்படுத்த முடியாது.

மத்திய கிழக்கு விவகாரங்களில் இரு நாடுகளையும் நம்பியிருக்க வேண்டிய கட்டாயத்தில் உள்ள பாகிஸ்தானுக்கு, இனிவரும் நாட்களில் தந்திரமான வெளியுறவுக் கொள்கைகளைக் கையாள்வதைத் தவிர வேறு வழியில்லை.