டெல்லியில் சாலைத் தகராறில் தொழிலதிபர் ஒருவர் டெலிவரி ஊழியர்களால் ஹெல்மெட்டால் அடித்துக் கொல்லப்பட்ட சம்பவம் பெரும் அதிர்ச்சியை ஏற்படுத்தியுள்ளது. டெல்லியின் ஷாலிமார் பாக் பகுதியைச் சேர்ந்த தொழிலதிபர் பங்கஜ் குப்தா என்பவர், தனது காரில் சென்று கொண்டிருந்தபோது அங்கிருந்த டெலிவரி ஊழியர்களுடன் வாக்குவாதத்தில் ஈடுபட்டுள்ளார்.

இந்த வாக்குவாதம் முற்றிய நிலையில், ஆத்திரமடைந்த மூன்று டெலிவரி ஊழியர்கள் தாங்கள் வைத்திருந்த ஹெல்மெட்டை ஆயுதமாகப் பயன்படுத்தி பங்கஜை சரமாரியாகத் தாக்கியுள்ளனர். பலத்த காயமடைந்த அவர் மருத்துவமனைக்கு கொண்டு செல்லும் வழியிலேயே உயிரிழந்தார். இந்தக் கொடூரச் சம்பவம் தொடர்பாக வழக்குப்பதிவு செய்துள்ள காவல்துறையினர், சிசிடிவி காட்சிகளின் அடிப்படையில் மூன்று பேரையும் கைது செய்துள்ளனர்.

இந்நிலையில் அற்ப காரணத்திற்காக ஒரு உயிரைப் பறிக்கும் அளவுக்கு வன்முறை கட்டவிழ்த்து விடப்பட்டுள்ளது சமூக ஆர்வலர்களிடையே கவலையை ஏற்படுத்தியுள்ளது. தலைநகரில் பட்டப்பகலில் நடந்த இந்த படுபாதகச் செயல், பொதுமக்களின் பாதுகாப்புக் குறித்த அச்சத்தை மீண்டும் ஒருமுறை கிளப்பியுள்ளது.