“இனிவரும் அனைத்துத் தேர்தல்களிலும் மதிமுக தனித்துச் சொந்தச் சின்னத்தில்தான் போட்டியிடும்” என்று அக்கட்சியின் முதன்மைச் செயலாளரும் நாடாளுமன்ற உறுப்பினருமான துரை வைகோ அதிரடியாக அறிவித்துள்ளார்.

தமிழகத்தில் தவெக கூட்டணியில் மதிமுக இணைய முயல்வதாகப் பரவலான தகவல்கள் கசிந்து வரும் நிலையில், துரை வைகோவின் இப்பேச்சு அரசியல் வட்டாரத்தில் பெரும் கவனத்தைப் பெற்றுள்ளது. இது குறித்து மேலும் பேசிய அவர், சொந்தச் சின்னத்தில் போட்டியிடுவது தொடர்பாகக் கட்சியின் பொதுக்குழு கூட்டத்தில் விரிவாக விவாதித்து இறுதி முடிவு எடுக்கப்படும் என்றும் சுட்டிக்காட்டியுள்ளார்.

கடந்த சட்டசபை தேர்தலில் திமுக கூட்டணியில் அங்கம் வகித்த மதிமுக, 4 தொகுதிகளில் உதயசூரியன் சின்னத்தில் போட்டியிட்டு 2 இடங்களில் வெற்றி பெற்றது குறிப்பிடத்தக்கது.

தற்போதைய ஆட்சி மாற்றத்திற்குப் பிந்தைய அரசியல் சூழலில், திமுகவின் உதயசூரியன் சின்னத்தைத் தவிர்த்துத் தனித்துவத்தை மீட்டெடுக்க மதிமுக முயல்வது தமிழக அரசியல் களம் மற்றும் சமூக வலைதளங்களில் புதிய விவாத அலைகளை உருவாக்கியுள்ளது.