காமன்வெல்த் விளையாட்டுப் போட்டியின் இறுதிக்கட்டத்தில் இந்தியா தொடர்ந்து பதக்கங்களை குவித்து வருகிறது. தடகளம், குத்துச்சண்டை ஆகிய பிரிவுகளைத் தொடர்ந்து பாரா தடகளத்திலும் இந்திய வீரர்கள் அசத்தி வருகின்றனர். ஆண்களுக்கான F57 பாரா ஷாட்புட் பிரிவில் இந்திய வீரர் சோமன் ராணா 13.40 மீட்டர் தூரம் எறிந்து தங்கப் பதக்கத்தை வென்று நாட்டுக்கு பெருமை சேர்த்தார். அதே போட்டியில் மற்றொரு இந்திய வீரரான சுபம் ஜுயால் வெள்ளிப் பதக்கத்தை கைப்பற்றியதால், இந்தியா இந்தப் பிரிவில் இரட்டை பதக்கத்தை வென்றது.

கிளாஸ்கோவில் நடைபெற்ற போட்டியில் தொடக்கத்தில் சுபம் ஜுயால் 13.08 மீட்டர் தூரம் எறிந்து முன்னிலையில் இருந்தார். ஆனால் அனுபவம் மிக்க சோமன் ராணா தனது சிறப்பான முயற்சியில் 13.40 மீட்டர் தூரம் எறிந்து முதலிடத்தை பிடித்தார். இதன் மூலம் காமன்வெல்த் போட்டியில் இந்தப் பிரிவில் தங்கப் பதக்கம் வென்ற முதல் இந்திய வீரர் என்ற பெருமையையும் அவர் பெற்றார். இந்திய வீரர்கள் இருவரும் மேடையில் இடம்பிடித்தது ரசிகர்களிடையே உற்சாகத்தை ஏற்படுத்தியது.

சோமன் ராணாவின் வெற்றி வெறும் பதக்க வெற்றியாக மட்டுமல்லாமல், விடாமுயற்சியின் அடையாளமாகவும் பார்க்கப்படுகிறது. இந்திய ராணுவத்தில் ஹவில்தாராக பணியாற்றி வரும் அவர், ஆரம்பத்தில் குத்துச்சண்டை வீரராக தனது விளையாட்டு வாழ்க்கையை தொடங்கினார். ஆனால் 2005-ஆம் ஆண்டு ஜம்மு-காஷ்மீரில் ரோந்துப் பணியில் இருந்தபோது கண்ணி  வெடிவிபத்தில் சிக்கி ஒரு காலை இழந்தார். அந்த சம்பவம் அவரது வாழ்க்கையை முற்றிலும் மாற்றியிருந்தாலும், மனம் தளராமல் புதிய இலக்கை நோக்கி பயணத்தைத் தொடங்கினார்.

அதன்பின் பாரா தடகளத்தில் கவனம் செலுத்திய சோமன் ராணா, கடின உழைப்பின் மூலம் சர்வதேச அரங்கில் தொடர்ந்து சாதித்து வருகிறார். 2022-ஆம் ஆண்டு பாரா ஆசிய விளையாட்டுப் போட்டியில் வெள்ளிப் பதக்கமும், 2025-ஆம் ஆண்டு பாரா உலக சாம்பியன்ஷிப்பில் வெண்கலப் பதக்கமும் வென்ற அவர், தற்போது காமன்வெல்த் போட்டியில் தங்கம் வென்று இந்தியாவின் பெருமையை மேலும் உயர்த்தியுள்ளார். அவரது சாதனை விளையாட்டு உலகில் பலருக்கும் ஊக்கமாக அமைந்துள்ளது.