ஒன்றிய உள்துறை அமைச்சகம் மாநில அரசுகளுக்குப் பிறப்பித்துள்ள புதிய உத்தரவு நாடு முழுவதும் பெரும் விவாதத்தைக் கிளப்பியிருக்கிறது. இனிவரும் காலங்களில் அரசு நிகழ்ச்சிகளில் தேசிய கீதமான ‘ஜன கன மன’ பாடப்படுவதற்கு முன்பாக, ‘வந்தே மாதரம்’ பாடலைத் தேசப்பற்றுடன் பாடுவது கட்டாயமாக்கப்பட உள்ளதாகத் தகவல்கள் வெளியாகியுள்ளன. மேலும், தேசிய கீதத்திற்கு நாம் எந்த அளவிற்கு மதிப்பும் மரியாதையும் அளிக்கிறோமோ, அதேபோல வந்தே மாதரம் பாடல் ஒலிக்கும்போதும் அனைவரும் எழுந்து நின்று மரியாதை செலுத்த வேண்டும் என்று அந்த உத்தரவில் குறிப்பிடப்பட்டுள்ளதாகக் கூறப்படுகிறது.
இந்த அறிவிப்பு தேசிய அளவில் ஒரு புதிய நடைமுறையை உருவாக்கத் திட்டமிட்டுள்ளதாகத் தெரிகிறது. தேசப்பற்றை ஊக்குவிக்கும் நோக்கில் கொண்டுவரப்பட்டுள்ளதாகச் சொல்லப்படும் இந்த மாற்றத்தை மாநில அரசுகள் எப்படி அணுகப்போகின்றன என்பதுதான் இப்போது பலரின் கேள்வியாக இருக்கிறது. ஏற்கனவே பல விவாதங்களுக்கு உள்ளான இந்தப் பாடல் குறித்த புதிய விதிமுறை, வரும் நாட்களில் அரசியல் ரீதியாகவும் நிர்வாக ரீதியாகவும் முக்கிய மாற்றங்களை ஏற்படுத்தும் என்று எதிர்பார்க்கப்படுகிறது.
