கிருஷ்ணகிரி மாவட்டம் வேப்பனப்பள்ளி அருகே உள்ள அரசு நடுநிலைப்பள்ளியில் ஆங்கில ஆசிரியராக பணியாற்றி வருபவர் பாலகிருஷ்ணன் (வயது 50). கடந்த சில வாரங்களாகவே அதே பள்ளியில் படிக்கும் 7 மற்றும் 8-ம் வகுப்பு மாணவிகள் மூவருக்கு அவர் பாலியல் தொந்தரவு அளித்து வந்ததாக புகார் எழுந்தது.

இது குறித்து மாணவிகள் தரப்பில் மாவட்ட கல்வித்துறையிடம் புகார் தெரிவிக்கப்பட்டது. இந்த புகாரை தொடர்ந்து கிருஷ்ணகிரி மாவட்ட கலெக்டர்  உத்தரவின்படி, மாவட்ட குழந்தைகள் பாதுகாப்பு அலுவலரும், வட்டார கல்வி அலுவலரும் சம்பந்தப்பட்ட பள்ளிக்கு நேரில் சென்று விசாரணை நடத்தினர். விசாரணையில் மாணவிகள் கூறிய தகவல்கள் உண்மையானது என உறுதி செய்யப்பட்டது.

இதையடுத்து, கிருஷ்ணகிரி அனைத்து மகளிர் காவல்நிலைய போலீசார், குறித்த ஆசிரியர் பாலகிருஷ்ணனை நேற்று மாலை கைது செய்தனர். அவருக்கு எதிராக குழந்தைகள் பாலியல் குற்றங்களில் தடுப்பதற்கான போக்சோ (POCSO) சட்டத்தின் கீழ் கடும் வழக்கு பதிவு செய்யப்பட்டுள்ளதோடு, தீவிர  விசாரணையும் நடைபெற்று வருகிறது.