கேரளாவின் கொல்லம் மாவட்டத்தில் உள்ள ஒரு தனியார் பள்ளியில், தலைமை ஆசிரியை சுடிதார் அணிந்து வந்ததற்காகப் பள்ளி வாசலிலேயே தடுத்து நிறுத்தப்பட்ட சம்பவம் பெரும் பரபரப்பை ஏற்படுத்தியுள்ளது. கேரள அரசு ஏற்கனவே ஆசிரியைகள் தங்களுக்கு விருப்பமான, வசதியான உடைகளை (சுடிதார் உட்பட) அணிந்து பணிக்கு வரலாம் என்று அரசாணை வெளியிட்ட பிறகும், ஒரு தனியார் பள்ளி நிர்வாகம் இத்தகைய கட்டுப்பாட்டை விதித்துள்ளது அதிர்ச்சியை ஏற்படுத்தியுள்ளது.
ஒரு தலைமை ஆசிரியருக்கே இந்த நிலை என்றால், மற்ற ஆசிரியைகளின் நிலை என்ன என்ற கேள்வியும், அரசின் உத்தரவை ஒரு தனியார் கல்வி நிறுவனம் மீறலாமா என்ற விவாதமும் சமூக வலைதளங்களில் அனல் பறக்கின்றன. இந்தச் சம்பவம் குறித்து நெட்டிசன்கள் மிகக் கடுமையான விமர்சனங்களை முன்வைத்து வருகின்றனர். “ஒரு ஆசிரியையின் தகுதியையும், அவர் சொல்லிக்கொடுக்கும் பாடத்தையும் அவர் அணியும் உடைதான் தீர்மானிக்கிறதா?” என்று பலரும் கேள்வி எழுப்புகின்றனர்.
உடை என்பது தனிமனித உரிமை மற்றும் வசதி சார்ந்தது என்பதால், அதில் கட்டுப்பாடுகளை விதிப்பது பிற்போக்குத்தனமானது என்று சமூக ஆர்வலர்கள் சாடுகின்றனர். கல்வி கற்கும் இடத்தில் ஒழுக்கம் முக்கியம் என்றாலும், அது உடையில் இல்லை, ஒருவரின் நடத்தையிலும் கற்பிக்கும் திறனிலும்தான் இருக்கிறது என்பதைப் பள்ளி நிர்வாகங்கள் எப்போது புரிந்து கொள்ளப் போகின்றன என்பதே பலரின் ஆதங்கமாக உள்ளது.
