மும்பை வெர்சோவா பகுதியில் உள்ள யாரி ரோட்டில் அமைந்துள்ள குடியிருப்பில் வசிக்கும் நபின் குரேஷி என்ற 27 வயது இளைஞர், முதுகலை பட்டப்படிப்பு படித்து வருகிறார். சம்பவத்தன்று காலை தனது அறையில் தூங்கிக் கொண்டிருந்தபோது, சமையலறையில் அவரது பெற்றோரான ஏஜாஸ் மற்றும் மோபினா இருவரும் சத்தமாகச் சண்டையிட்டுள்ளனர்.

இதனால் ஏற்பட்ட கடுமையான கோபத்தாலும் எரிச்சலாலும் திடீரெனக் கட்டுப்பாட்டை இழந்த அந்த இளைஞர், சமையலறையில் இருந்த கத்தியை எடுத்து தனது தாய் மற்றும் தந்தையின் முகத்திலேயே பலமாக வெட்டித் தாக்கியுள்ளார்.

இந்தத் தாக்குதலில் படுகாயமடைந்த தனது வயதான பெற்றோரை அந்த இளைஞரே நேரில் அழைத்துக்கொண்டு அந்தப் பகுதியில் உள்ள மருத்துவமனைக்கு அவசரமாகச் சென்று சேர்த்துள்ளார். இதற்கிடையே வீட்டின் அருகில் இருந்த அயலவர் ஒருவர் முதிய தம்பதியின் காயங்களைக் கவனித்து உடனடியாகக் காவல்துறையினருக்குத் தகவல் அளித்துள்ளார்.

தகவலறிந்து விரைந்து வந்த போலீசார் மருத்துவமனையில் சிகிச்சை பெற்று வந்தவர்களை விசாரித்ததோடு, தாக்குதலுக்குப் பயன்படுத்தப்பட்ட கத்தியையும் அந்த வீட்டிலிருந்து கைப்பற்றி நபின் குரேஷியைக் கைது செய்தனர்.

கைது செய்யப்பட்டவனிடம் நடத்தப்பட்ட விசாரணையின்போது, கடந்த இரண்டு ஆண்டுகளாக அவனுக்குத் தீவிரமான மன அழுத்தப் பிரச்சனை இருப்பதாகவும், அதற்காக அவன் தொடர்ந்து மருத்துவச் சிகிச்சை பெற்று வருவதாகவும் அவனது தாய் காவல்துறையிடம் தெரிவித்துள்ளார்.

பெற்றோர் மீது நடத்தப்பட்ட இந்த கொடூரத் தாக்குதல் தொடர்பாகக் கொலை முயற்சி மற்றும் ஆபத்தான ஆயுதங்களைக் கொண்டு காயம் விளைவித்தலின் கீழ் வழக்குப்பதிவு செய்துள்ள போலீசார், தீவிர விசாரணை நடத்தி வருகின்றனர்.