சமூக வலைதளங்களான இன்ஸ்டாகிராம் மற்றும் பேஸ்புக்கில் சில ‘லைக்குகள்’ மற்றும் ‘ஃபாலோயர்கள்’ பெற வேண்டும் என்பதற்காகத் துப்பாக்கி போன்ற ஆபத்தான ஆயுதங்களைக் கையில் பிடித்துக் கொண்டு ஸ்டைலில் ரீல்ஸ் வீடியோக்கள் வெளியிடும் மோகம் இன்றைய இளைஞர்களிடையே அதிகரித்து வருகிறது.

அந்த வகையில், மகாராஷ்டிர மாநிலம் சுபா பகுதிக்கு உட்பட்ட பகுதியில் இளைஞர் ஒருவர் கையில் துப்பாக்கியை வைத்துக்கொண்டு, தன்னை ஒரு பெரிய தாதா போலச் சித்தரித்து மிகவும் ஆக்ரோஷமாக ரீல்ஸ் வீடியோ ஒன்றை உருவாக்கித் தனது இன்ஸ்டாகிராம் பக்கத்தில் பதிவிட்டுள்ளார்.

அந்தச் சட்டவிரோத வீடியோ சமூக வலைதளங்களில் பரவி மக்கள் மத்தியில் பெரும் பீதியை ஏற்படுத்திய நிலையில், சுபா காவல் நிலைய அதிகாரிகளின் கவனத்திற்கும் அது சென்றுள்ளது. உடனே களத்தில் இறங்கிய சுபா காவல்துறையினர், அந்த வீடியோவை வெளியிட்ட சமூக விரோதியின் இன்ஸ்டாகிராம் கணக்கை நுட்பமாக ஆய்வு செய்து, அவரது இருப்பிடத்தைக் கண்டறிந்தனர்.

பொதுமக்கள் மற்றும் பிற இளைஞர்களுக்கு அச்சுறுத்தல் விளைவிக்கும் வகையில் நடந்து கொண்ட அந்த நபரை, காவல்துறையினர் தேடிச் சென்று தூக்கி வந்து காவல் நிலையத்தில் அடைத்தனர். சமூக வலைதளங்களில் லைக்ஸ்களுக்காகவும், போலியான கெத்துக்காகவும் ஆயுதங்களைக் காட்டி ரீல்ஸ் செய்யும் இளைஞர்களுக்குச் சுபா காவல்துறையினரின் இந்த அதிரடி நடவடிக்கை ஒரு கடுமையான எச்சரிக்கையாக அமைந்துள்ளது.

பொதுமக்கள் வசிக்கும் பகுதியில் சட்டத்திற்குப் புறம்பாக ஆயுதங்களைக் காட்டுவதும், ரவுடிசத்தை ஊக்குவிக்கும் வகையில் வீடியோ பதிவிடுவதும் சட்டப்படி கடுமையான குற்றமாகும். லைக்ஸ்களுக்கு ஆசைப்பட்டுத் தங்களின் எதிர்காலத்தையும் வாழ்க்கையையும் வீணடித்துக் கொள்ள வேண்டாம் என்றும், இதுபோன்ற ஆபத்தான ரீல்ஸ் மோகத்தில் ஈடுபடுபவர்கள் மீது சட்டம் பாயும் என்றும் காவல்துறையினர் கடுமையாக எச்சரித்துள்ளனர்.