வேலைக்கு செல்வதுடன் கூடுதல் வருமானத்துக்காக சுயமாக பணியாற்றி, 4 முதல் 5 ஆண்டுகளில் ரூ.1 கோடி அளவுக்கு சொத்து சேர்த்த 27 வயது இளைஞரின் கதை இணையத்தில் கவனம் பெற்றுள்ளது. தகவல் தொழில்நுட்பத் துறையில் பணியாற்றி வரும் அவர், கடந்த சில ஆண்டுகளாக ஓய்வின்றி கடுமையாக உழைத்ததாக தெரிவித்துள்ளார். முழுநேரப் பணியுடன் கூடுதல் பணிகளையும் செய்து வந்ததால், வாரத்தின் அனைத்து நாள்களிலும் வேலை செய்ய வேண்டிய நிலை இருந்ததாக கூறியுள்ளார். இதன் மூலம் தனது சேமிப்பை படிப்படியாக உயர்த்தியுள்ளார்.

தனது சேமிப்பில் ஒரு பகுதியை பரஸ்பர நிதி, நிலையான வைப்பு உள்ளிட்ட முதலீடுகளில் வைத்திருப்பதாக அவர் தெரிவித்துள்ளார். தற்போது தனது நிதி நிலை ஓரளவு பாதுகாப்பாக இருப்பதாக கருதினாலும், தொடர்ந்து வேலை செய்வதில் அதிக சோர்வு ஏற்பட்டுள்ளதாக கூறியுள்ளார். பணியில் ஏற்படும் காலக்கெடு, தொடர் கூட்டங்கள், இலக்குகளை அடைய வேண்டிய அழுத்தம் ஆகியவை தன்னை மிகவும் சோர்வடையச் செய்துள்ளதாக தெரிவித்துள்ளார். இதனால் இனியும் இதேபோன்று பணியாற்ற முடியுமா என்ற கேள்வி அவருக்குள் எழுந்துள்ளது.

இதையடுத்து, தன்னிடம் உள்ள ரூ.1 கோடி சேமிப்பை வைத்துக்கொண்டு இளம் வயதிலேயே பணியில் இருந்து விலகி விடலாமா என்ற கேள்வியை அவர் சமூக வலைதளத்தில் எழுப்பியுள்ளார். அவரது பதிவுக்கு பலரும் தங்களது கருத்துகளை தெரிவித்துள்ளனர். சிலர், உடனடியாக நிரந்தரமாக பணியை விட்டு விலகுவதற்கு பதிலாக சிறிது காலம் ஓய்வு எடுத்துக்கொள்ளலாம் என்று அறிவுறுத்தியுள்ளனர். இன்னும் சிலர், இளம் வயதிலேயே வருமானத்தை முற்றிலும் நிறுத்துவது எதிர்காலத்தில் சிக்கலை ஏற்படுத்தக்கூடும் என்றும் தெரிவித்துள்ளனர்.

இந்த இளைஞரின் அனுபவம், பணம் சம்பாதிப்பதற்காக ஓய்வின்றி ஓடுவதற்கும் வாழ்க்கையில் நிம்மதியாக இருப்பதற்கும் இடையே சமநிலை தேவை என்பதை உணர்த்தியுள்ளது. ரூ.1 கோடி சேமித்திருப்பது பாராட்டுக்குரிய சாதனை என்றாலும், எதிர்கால செலவுகள் மற்றும் தேவைகளையும் கருத்தில் கொண்டு முடிவு எடுக்க வேண்டும் என்று பலர் கூறியுள்ளனர். அதே நேரத்தில், உடல் மற்றும் மன நலனையும் வாழ்க்கை மகிழ்ச்சியையும் புறக்கணித்து பணம் சேர்ப்பது மட்டுமே வெற்றியல்ல என்றும் கருத்துகள் பதிவாகியுள்ளன. அவரது கதை, “பணம் முக்கியம்; ஆனால் நிம்மதியான வாழ்க்கையும் அதே அளவு முக்கியம்” என்ற எண்ணத்தை பலரிடமும் ஏற்படுத்தியுள்ளது.