தாய்லாந்து நாட்டின் பாரம்பரிய புத்தாண்டு திருவிழாவான ‘சோங்க்ரான்’ கொண்டாட்டங்களின் போது நிகழ்ந்த சாலை விபத்துகள் பெரும் சோகத்தை ஏற்படுத்தியுள்ளன. ஏப்ரல் மாத நடுப்பகுதியில் ஒரு வாரம் முழுவதும் கொண்டாடப்படும் இந்தத் திருவிழாவின் போது, மக்கள் தங்கள் சொந்த ஊர்களுக்குப் பயணம் செய்வது வழக்கம்.

இந்த ஆண்டு ஏப்ரல் 13 முதல் தொடங்கிய கொண்டாட்டங்களின் போது, முதல் சில நாட்களில் மட்டும் சுமார் 951 சாலை விபத்துகள் பதிவாகியுள்ளன. இந்த விபத்துகளில் 191 பேர் உயிரிழந்துள்ளதோடு, நூற்றுக்கணக்கானோர் காயமடைந்துள்ளனர். இந்த ஒரு வார காலத்தை அந்நாட்டு மக்கள் “ஏழு ஆபத்தான நாட்கள்” என்று குறிப்பிடுகின்றனர்.

இந்த விபத்துகளுக்குப் பின்னால் அதிவேகப் பயணம் மற்றும் மது அருந்திவிட்டு வாகனம் ஓட்டுதல் ஆகியவையே முக்கியக் காரணங்களாகக் கண்டறியப்பட்டுள்ளன. புள்ளிவிவரங்களின்படி, சுமார் 42% விபத்துகள் வாகனங்களை மிக வேகமாக இயக்கியதாலும், 27% விபத்துகள் மது போதையில் வாகனம் ஓட்டியதாலும் நிகழ்ந்துள்ளன.

இது குறிப்பாக மாலை 3 மணி முதல் 6 மணி வரையிலான நேரத்திலேயே அதிகப்படியான விபத்துகள் நடப்பதாக அந்நாட்டின் பேரிடர் தடுப்புப் பிரிவு எச்சரித்துள்ளது. ஒருபுறம் இந்த விழா தாய்லாந்து பொருளாதாரத்திற்குப் பல கோடி வருவாயையும், லட்சக்கணக்கான சுற்றுலாப் பயணிகளையும் ஈர்த்தாலும், இத்தகைய உயிரிழப்புகள் புத்தாண்டு கொண்டாட்டத்தில் பெரும் கவலையை ஏற்படுத்தியுள்ளன.