சுமார் 6.6 கோடி ஆண்டுகளுக்கு முன்பு இந்த பூமியை ஆட்சி செய்து வந்த பிரம்மாண்ட உயிரினங்களான டைனோசர்கள், ஒரே இரவில் ஒட்டுமொத்தமாக அழிந்துபோன வரலாறு நமக்கு வியப்பையும் அதிர்ச்சியையும் அளிப்பதாகும். இவ்வளவு பெரிய உயிரினங்கள் எப்படி ஒரே நேரத்தில் பூமியிலிருந்து மறைந்தன என்ற கேள்வி பல தசாப்தங்களாக நிலவி வந்த நிலையில், அதற்கான துல்லியமான காரணத்தை விஞ்ஞானிகள் கண்டறிந்து உலகையே வியப்பில் ஆழ்த்தியுள்ளனர்.

பூமியை நோக்கி சுமார் 10 முதல் 15 கிலோமீட்டர் விட்டம் கொண்ட ஒரு மிகப்பெரிய ராட்சத விண்கல்  மணிக்கு பல்லாயிரம் கிலோமீட்டர் வேகத்தில் வந்து மோதியதே இந்த பேரழிவுக்கு முக்கிய காரணம் என ஆய்வுகள் உறுதிப்படுத்தியுள்ளன. தற்போதைய மெக்சிகோ நாட்டின் யுகடான் தீபகற்ப பகுதியில் அமைந்துள்ள ‘சிக்சுலுப்’   என்ற இடத்தில் தான் இந்த அதிபயங்கர விண்கல் மோதியது. இதன் மோதல் சக்தி, பல நூறு அணுகுண்டுகள் ஒரே நேரத்தில் வெடிப்பதற்குச் சமமான பேரழிவை பூமியில் ஏற்படுத்தியது.

இந்த விண்கல் மோதிய அடுத்த நொடியே, பூமியில் பல நூறு மீட்டர் உயரத்திற்கு பிரம்மாண்ட சுனாமி அலைகள் எழும்பின. நிலநடுக்கமும் எரிமலை வெடிப்புகளும் தொடர்ச்சியாக ஏற்பட்டு, வளிமண்டலம் முழுவதும் தூசி, புகை மற்றும் பாறைத் துகள்களால் சூழப்பட்டது. இதனால் சூரிய ஒளி பூமிக்கு வருவதே பல மாதங்கள் தடைபட்டு, உலகம் முழுவதும் கடுமையான இருளும் கடும் குளிரும் சூழ்ந்தது. தாவரங்கள் ஒளிச்சேர்க்கை செய்ய முடியாமல் காய்ந்து போக, உணவின்றி டைனோசர்கள் உள்ளிட்ட பூமியின் 75 சதவீத உயிரினங்கள் படிப்படியாக அழிந்தன.

சமீபத்திய ஆய்வுகளில், இந்த விண்கல் எங்ஙனம் உருவானது மற்றும் அது எந்த திசையிலிருந்து பூமியைத் தாக்கியது என்பது குறித்த கூடுதல் சான்றுகளை சர்வதேச விஞ்ஞானிகள் சேகரித்துள்ளனர். பூமியின் வரலாற்றையே மாற்றி அமைத்து, பாலூட்டிகள் மற்றும் மனிதர்களின் பரிணாம வளர்ச்சிக்கு வழிவகுத்த அந்த வரலாற்றுச் சிறப்புமிக்க விண்கல் மோதல் பற்றிய அறிவியல் ஆதாரங்கள், இன்றும் மனித குலத்தை பெரும் ஆச்சரியத்தில் ஆழ்த்தி வருகின்றன.