ஜப்பான் நாட்டைச் சேர்ந்த தம்பதி Otou மற்றும் Yumi. இவர்களுக்கு திருமணமாகி குழந்தைகள் பிறந்த நிலையில், கணவன் Otou தனது மனைவியிடம் பேசுவதை திடீரென முற்றிலும் நிறுத்திக்கொண்டார். வெறும் தலை அசைப்பது, முணுமுணுப்பது போன்ற செய்கைகள் மூலமாக மட்டுமே பதிலளித்து வந்த இவர், கடந்த 20 ஆண்டுகளாகத் தனது மனைவியிடம் ஒரு வார்த்தைகூடப் பேசாமல் மௌனம் காத்து வந்தார்.

​இவர்களது 18 வயது மகனான Yoshiki, தனது வாழ்நாளில் தனது பெற்றோர் இருவரும் நேருக்கு நேர் ஒருவருக்கொருவர் பேசித் தான் பார்த்ததே இல்லை என்ற வேதனையுடன் வளர்ந்து வந்துள்ளார். பெற்றோர் இடையே இருக்கும் இந்த விசித்திரமான மௌனத்தை உடைத்து, அவர்களை மீண்டும் பேச வைக்க வேண்டும் என்பதற்காக, ஜப்பானில் புகழ்பெற்ற ஒரு தொலைக்காட்சி நிகழ்ச்சியைத் தொடர்புகொண்டு உதவி கேட்டுள்ளார்.

​அந்தத் தொலைக்காட்சி குழுவினர் நடத்திய தீவிர முயற்சியின் பலனாக, இவர்களது 20 ஆண்டுகால மௌனத்திற்கான அசல் காரணம் வெளிச்சத்திற்கு வந்தது. குழந்தைகள் பிறந்த பிறகு, தனது மனைவி குழந்தைகள் மீது மட்டுமே முழு கவனத்தையும் அன்பையும் செலுத்துவதாகவும், தன்னை முற்றிலுமாகப் புறக்கணித்து விட்டதாகவும் எண்ணி கணவன் Otou கடுமையான பொறாமையும் ஏமாற்றமும் அடைந்துள்ளார். அந்தப் பொறாமையின் வெளிப்பாடாகவே மனைவியிடம் பேசுவதையே நிறுத்தியுள்ளார்.

​இதனையடுத்து, அவர்கள் இருவரும் முதன்முதலில் சந்தித்து ‘டேட்’ செய்த அதே பூங்கா பெஞ்சிற்கு இருவரையும் வரவழைத்துத் தொலைக்காட்சி குழுவினர் ஏற்பாடு செய்தனர். 20 ஆண்டுகளுக்குப் பிறகு அதே பூங்கா பெஞ்சில் மனைவியின் அருகில் அமர்ந்த கணவன் Otou, “நீ பல சிரமங்களைச் சகித்துக் கொண்டாய். குழந்தைகள் மீது அதிக கவனம் செலுத்தினாய். Yumi, இதுவரைக்கும் எல்லாவற்றிற்கும் ரொம்ப நன்றி… நான் உன்னிடம் பேச விரும்புகிறேன்” என்று மிகவும் நெகிழ்ச்சியுடன் கூறித் தனது மனைவியிடம் மன்னிப்பு கேட்டார்.

​20 ஆண்டுகளாக ஒரு வார்த்தைகூடப் பேசாத கணவன், மீண்டும் தன் பழைய அன்போடு பேசியதைக் கண்டு மனைவி Yumi கண்ணீர் விட்டு அழுதார். இவர்களின் இந்த உருக்கமான மறு இணைப்பு மற்றும் கணவனின் இதயப்பூர்வமான மன்னிப்பு, மறைந்திருந்து பார்த்துக் கொண்டிருந்த அவர்களது பிள்ளைகளையும், தொலைக்காட்சிப் பார்வையாளர்களையும் பெரும் நெகிழ்ச்சியில் ஆழ்த்தியது.