மும்பையின் தஹிசர் ஈஸ்ட் பகுதியில் தாயார், சகோதரர், மனைவி மற்றும் 10 வயது மகனுடன் வசித்து வரும் பிரஷாந்த் நாக்வேகர் (வயது 45), ஆண்டெரியில் உள்ள ஒரு தனியார் நிறுவனத்தில் அலுவலக உதவியாளராக வேலை பார்த்து வருகிறார்.

ஆனால் கடனில் துவண்டு கொண்டிருக்கும் அவர், குடும்ப செலவுகளைச் சமாளிக்க முடியாத நிலையில், இணையத்தில் சிறுநீரக விற்பனைக்கு தொடர்பான தகவல்களைத் தேடி வந்தார்.

அப்போது, டெல்லியில் உள்ள ‘ஸஹ்யாத்ரி ஹாஸ்பிட்டல்’ எனும் பெயரில் சிறுநீரகம்  வாங்குவதாகக் கூறும் ஒரு விளம்பரத்தை இணையத்தில் கண்டுபிடித்து, அதில் கொடுக்கப்பட்ட நம்பரை அழைத்தார்.

கடன்களால் பாதிக்கப்பட்டிருப்பதாகவும், சிறுநீரகத்தை விற்க விருப்பம் இருப்பதாகவும் அவர் தெரிவித்தார். அந்த நபர், “ஒரு சிறுநீரகத்திற்கு ₹1 கோடி வழங்கப்படும்” என்று கூறி நம்பிக்கை ஏற்படுத்தினார்.

இதில் நம்பிக்கை வைத்து, பிரஷாந்த் நாக்வேகர் தனது ரத்தக் குழு, வயது, முகவரி போன்ற தகவல்களை பகிர்ந்தார். அதன்பின், அறுவை சிகிச்சைக்கான செயல்முறை கட்டணமாக ₹2.95 லட்சம் செலுத்துமாறு கூறப்பட்டது.

அதை மூன்று தவணைகளாக செலுத்தவும் அனுமதி அளிக்கப்பட்டதால், அவர் நண்பர்கள் மற்றும் உறவினர்களிடம் கடன் வாங்கி அந்த தொகையை அனுப்பினார். ஆனால் தொடர்ந்து அறுவை சிகிச்சைக்காக அழைப்பதாக கூறிய நபர், பின்னர் மொபைலை அணைத்து விட்டார்.

இதனையடுத்து தான் ஏமாற்றப்பட்டதை உணர்ந்த நாக்வேகர், உடனே தஹிசர் காவல் நிலையத்தில் புகார் அளித்தார். போலீசார் தகவல் தொழில்நுட்ப சட்டத்தின் கீழ் (IT Act) சைபர் மோசடி வழக்குப்பதிவு செய்து விசாரணை மேற்கொண்டு வருகின்றனர். கடன் சுமையால் அவதிப்படும் பொதுமக்கள், இதுபோன்ற மோசடி கும்பல்களின் பாதிப்பில் சிக்கவேண்டாம் என அதிகாரிகள் எச்சரிக்கின்றனர்.