ஈரான் மற்றும் இஸ்ரேல்-அமெரிக்கா இடையிலான போர் தீவிரமடைந்து வரும் நிலையில், ஈரானிய ஏவுகணைகள் அமெரிக்க இராணுவத் தளங்களைத் துல்லியமாகத் தாக்குவது உலக நாடுகளை வியப்பில் ஆழ்த்தியுள்ளது. இதற்குப் பின்னால் சீனாவின் ‘பெய்டூ’ செயற்கைக்கோள் வழிசெலுத்தல் அமைப்பு இருக்கலாம் என்று நிபுணர்கள் கருதுகின்றனர்.

சீனாவுடன் 25 ஆண்டுகால மூலோபாய ஒப்பந்தத்தில் ஈடுபட்டுள்ள ஈரான், அமெரிக்காவின் ஜிபிஎஸ் தொழில்நுட்பத்திற்கு மாற்றாக சீனாவின் இந்த வலிமைமிக்க அமைப்பைப் பயன்படுத்துவதாக நம்பப்படுகிறது.

சுமார் 50-க்கும் மேற்பட்ட செயற்கைக்கோள்களைக் கொண்டுள்ள பெய்டூ, அமெரிக்காவின் ஜிபிஎஸ்ஸை விட அதிக துல்லியத்தன்மை கொண்டது என்பதுடன், போர் காலங்களில் அமெரிக்காவால் இதை எளிதில் முடக்க முடியாது என்பது ஈரானுக்குப் பெரும் சாதகமாக அமைந்துள்ளது.

பெய்டூ அமைப்பின் சிறப்பம்சம் என்னவென்றால், இது வெறும் இருப்பிடத்தைக் காட்டுவதோடு மட்டுமல்லாமல் குறுஞ்செய்திகளை அனுப்பும் வசதியையும் கொண்டுள்ளது. ராணுவப் பயன்பாட்டிற்கு இது ஒரு சென்டிமீட்டர் வரையிலான மிகத் துல்லியமான இலக்குகளை வழங்கும் திறன் கொண்டது.

ஈரானிடம் சொந்தமாக செயற்கைக்கோள் கட்டமைப்பு இல்லாததால், அதன் ஏவுகணைகள் மற்றும் ட்ரோன்கள் இலக்கை நோக்கித் துல்லியமாகப் பயணிக்க சீனாவின் இந்த ராணுவ தர சமிக்ஞைகள் உயிர்நாடியாகச் செயல்படுகின்றன.

முன்னதாக இலக்குகளைத் தவறவிட்ட ஈரானிய ஏவுகணைகள், தற்போது நேரடியாகப் பகை நாடுகளின் நிலைகளைத் தாக்குவதற்கு இந்தத் தொழில்நுட்ப முன்னேற்றமே முக்கிய காரணமாகக் கூறப்படுகிறது.

இந்த சீன-ஈரான் கூட்டுறவு அமெரிக்காவிற்கும் இஸ்ரேலுக்கும் பெரும் சவாலாக மாறியுள்ளது. அமெரிக்கா தனது ஜிபிஎஸ் அமைப்பைக் கட்டுப்படுத்த முடிந்தாலும், சீனாவின் கட்டுப்பாட்டில் உள்ள பெய்டூவைச் சிதைப்பது கடினம். இதனால் இஸ்ரேலின் ‘அயர்ன் டோம்’ போன்ற பாதுகாப்பு அமைப்புகளையும் மீறி ஈரானிய ஏவுகணைகள் அச்சுறுத்தலை ஏற்படுத்துகின்றன.

சீனாவின் இந்த விண்வெளித் தொழில்நுட்பம் தற்போது ஒரு புவிசார் அரசியல் ஆயுதமாக மாறியுள்ளதுடன், மத்திய கிழக்கில் நிலவி வந்த ராணுவச் சமநிலையை மாற்றி அமைக்கும் வல்லமை கொண்டதாகவும் பார்க்கப்படுகிறது. இது அமெரிக்காவின் உலகளாவிய ஆதிக்கத்திற்கு நேரடியாக விடுக்கப்பட்ட எச்சரிக்கையாகவே சர்வதேச வல்லுநர்களால் கருதப்படுகிறது.