சென்னையில் உள்ள தனது இல்லத்தில் மூத்த நிர்வாகிகளையும் தொண்டர்களையும் சந்தித்த திமுக தலைவர் மு.க.ஸ்டாலின், இன்னும் 6 மாதங்களில் விஜய் தலைமையிலான ஆட்சி கவிழும் என்று மிகத் தீவிரமாகக் கூறியுள்ளார்.

கடந்த மூன்று நாட்களாகவே அவர் இதே போன்ற கருத்தை வலியுறுத்திப் பேசி வருவது அரசியல் வட்டாரத்தில் பெரும் பரபரப்பை ஏற்படுத்தியுள்ளது.

தற்போதைய விஜய் ஆட்சியில் ஆங்காங்கே ஊழல்கள் நடக்கத் தொடங்கிவிட்டதாகக் கூறப்படும் நிலையில், தமிழக வெற்றிக் கழகத்தின் உட்கட்சி விவகாரங்கள் ஏதேனும் ஸ்டாலினுக்குக் கசிந்துள்ளதா அல்லது திமுக தரப்பு ஏதேனும் சட்டமன்ற உறுப்பினர்களைக் குறிவைத்துள்ளதா என்ற பலத்த சந்தேகம் எழுந்துள்ளது.

மறுபுறம், விஜய்யின் ஆட்சிக்கு ஆதரவாக இருக்கும் அதிமுக சட்டமன்ற உறுப்பினர்களுக்கு அமைச்சர் பதவி கொடுத்தால், தாங்கள் அளித்து வரும் ஆதரவை வாபஸ் பெற்றுக்கொள்வோம் என்று கம்யூனிஸ்ட் கட்சிகள் அறிவித்துள்ளன. இதனால், தற்போதைய ஆட்சிக்கு இருக்கும் ஆதரவு குறையும் சூழல் உருவாகியுள்ளது.

இதனைப் பயன்படுத்தி, விஜய்க்கு ஆதரவளிக்கும் அதிமுகவினரை மீண்டும் எடப்பாடி பழனிசாமி தலைமையிலான அதிமுக அணியோடு இணைய வைப்பதற்காக, திமுகவின் முன்னாள் அமைச்சர்கள் திரைமறைவில் பேச்சுவார்த்தை நடத்தி அழுத்தம் கொடுத்து வருவதாகக் கூறப்படுகிறது.

அவர்கள் மீண்டும் தாய் கழகத்திற்குச் சென்றால் விஜய்யின் ஆட்சி கவிழ்வது உறுதி என்பதால், திமுக ஏதோ ஒரு பெரிய திட்டத்தை வகுத்துச் செயல்பட்டு வருவது தற்போது தெளிவாகப் புரிகிறது.