இந்தியா மற்றும் பாகிஸ்தான் இடையே கையெழுத்தான சிந்து நதிநீர் ஒப்பந்தத்தை இந்தியா நிறுத்துவதாக அறிவித்ததைத் தொடர்ந்து, பாகிஸ்தானில் பெரும் பரபரப்பும் பதற்றமும் ஏற்பட்டுள்ளது. சமீபத்திய பயங்கரவாதத் தாக்குதலுக்குப் பிறகு இந்தியா எடுத்துள்ள இந்த அதிரடி நடவடிக்கையால், பாகிஸ்தான் அரசு அதிர்ச்சியில் உள்ளது.
குறிப்பாக சிந்து மாகாணத்தில் பிலாவல் பூட்டோவின் பாகிஸ்தான் மக்கள் கட்சி ஆதரவாளர்கள், “சிந்து நதியை விட்டுக்கொடுக்க மாட்டோம்” என்று முழக்கமிட்டு போராட்டத்தில் ஈடுபட்டு வருகின்றனர். கராச்சி முதல் ஷிகார்பூர் வரை மக்கள் வீதியில் இறங்கிப் போராடி வருவதால், அந்தப் பகுதியில் பெரும் பதற்றம் நிலவுகிறது.
பாகிஸ்தான் அமைச்சர்கள் சிலர் இந்த முடிவை எதிர்த்து போர்க்கொடி தூக்கியுள்ளனர். நதிநீரை இந்தியா தடுத்தால், தங்களுக்குப் போரைத் தவிர வேறு வழியில்லை என்று அவர்கள் மிரட்டல் விடுத்து வருகின்றனர்.
ஆனால், இந்தியா இந்த முடிவை பாகிஸ்தான் மக்கள் மீது எடுக்கவில்லை; மாறாக, எல்லை தாண்டிய பயங்கரவாதத்தை ஊக்குவிக்கும் அந்நாட்டு அரசின் மீதுதான் இந்தத் தடைகளை விதித்துள்ளது.
பயங்கரவாதச் செயல்களை ஆதரித்து, அமைதி ஒப்பந்தத்தின் விதிகளை மீறியதற்காகவே இந்தியா இத்தகைய கடுமையான நடவடிக்கையை எடுத்துள்ளதாகத் தெரிகிறது. பாகிஸ்தான் தலைவர்களின் தொடர்ச்சியான மிரட்டல்களுக்கு, இந்த நதிநீர் ஒப்பந்த ரத்து ஒரு தகுந்த பதிலடியாகப் பார்க்கப்படுகிறது.
