தமிழக அரசியலில் அடுத்த தலைமுறை இளைஞர்களைத் தன் பக்கம் ஈர்க்க திமுக மற்றும் தவெக இடையே மறைமுகப் போட்டி வலுத்துள்ள நிலையில், திமுக மாணவர் அணி செயலாளர் வீரமணி ஜெயக்குமார் தெரிவித்துள்ள கருத்துக்கள் விவாதத்தை கிளப்பியுள்ளன.

“தற்போதைய இளைஞர்களில் ஒரு தரப்பினர் தற்குறிகளாக மாறிக் கொண்டிருக்கும் வேளையில், அவர்களை நல்வழிப்படுத்த முதல்வர் ஸ்டாலின் ‘தமிழ் மாணவர் மன்றம்’ என்ற மிகப்பெரிய முன்னெடுப்பை எடுத்துள்ளார்” என அவர் குறிப்பிட்டுள்ளார். இந்த மன்றத்தின் நிர்வாகிகள் மூலம் அரசு கொண்டு வந்துள்ள ‘நான் முதல்வன்’, ‘தமிழ் புதல்வன்’, ‘புதுமைப் பெண்’ மற்றும் ‘தோழி விடுதி’ போன்ற உன்னதமான திட்டங்களை மாணவர்களிடம் கொண்டு சேர்த்து, அவர்களின் எதிர்காலத்தைச் சீரமைக்க ஒரு வலுவான கட்டமைப்பு உருவாக்கப்பட்டுள்ளதாக அவர் பெருமிதத்துடன் தெரிவித்துள்ளார்.

குறிப்பாக, “இப்படியும் இளைஞர்கள் இருக்கிறார்கள் என்பதை உலகிற்குத் தெரியப்படுத்திய விஜய்க்கு நன்றி” என அவர் கூறியுள்ளது, தவெக-வின் அரசியல் வருகைக்கும் திமுக-வின் மாணவர் நலத் திட்டங்களுக்கும் இடையிலான ஒப்பீடாகவே பார்க்கப்படுகிறது. அறிவார்ந்த சமூகமாக மாற வேண்டிய இளைஞர்கள் தடம் மாறிச் செல்லாமல் தடுக்க, திமுக அரசு கல்வி மற்றும் வாழ்வாதார ரீதியான திட்டங்களை எப்படி ஒரு ஆயுதமாகப் பயன்படுத்துகிறது என்பதை அவர் விளக்கினார்.

“>

மாணவர்களின் எதிர்காலத்தை ஒரு ஒழுங்கான கட்டமைப்பிற்குள் கொண்டு வருவதே இந்த முன்னெடுப்பின் நோக்கம் என்றும், தமிழக இளைஞர்கள் மீண்டும் ஒரு அறிவார்ந்த சமூகமாக மாற இதுவே வழிவகுக்கும் என்றும் அவர் நம்பிக்கை தெரிவித்துள்ளார்.