அலுவலக மின்னஞ்சலில் பயன்படுத்தப்படும் நாகரிகமற்ற அல்லது ஆபாசமான வார்த்தைகள் அனைத்தும் ‘பாலியல் துன்புறுத்தல்’ என்ற வரம்பிற்குள் வராது என்று பஞ்சாப் மற்றும் ஹரியானா உயர் நீதிமன்றம் ஒரு முக்கிய தீர்ப்பை வழங்கியுள்ளது. குருகிராமில் உள்ள ஒரு தனியார் நிறுவனத்தின் இயக்குநர், பெண் ஊழியர் ஒருவருக்கு அனுப்பிய மின்னஞ்சலில் தரக்குறைவான ஆங்கிலச் சொல்லைப் பயன்படுத்தியதற்காகத் தொடரப்பட்ட வழக்கை விசாரித்த நீதிபதி கீர்த்தி சிங், இந்த அதிரடி உத்தரவைப் பிறப்பித்தார்.

இதனால் அந்த குறிப்பிட்ட சொல் மரியாதைக்குறைவானது என்பதில் மாற்றுக்கருத்தில்லை என்றாலும், அது பாலியல் ரீதியான உள்நோக்கத்தையோ அல்லது ஒரு பெண்ணின் கண்ணியத்தைச் சீர்குலைக்கும் சமிக்ஞைகளையோ கொண்டிருக்கவில்லை என நீதிமன்றம் சுட்டிக்காட்டியுள்ளது. இந்திய தண்டனைச் சட்டம் பிரிவு 354A-ன் கீழ் ஒருவரைத் தண்டிக்கத் தேவையான பாலியல் அத்துமீறல் கூறுகள் அந்த மின்னஞ்சலில் இல்லை என்று குறிப்பிட்ட நீதிபதி, அந்த இயக்குநர் மீதான முதல் தகவல் அறிக்கையை ரத்து செய்தார்.

இருப்பினும், பொதுவெளியில் அநாகரிகமாக நடந்துகொண்டதற்காக, சண்டிகரில் உள்ள ஏழை நோயாளி நல நிதிக்கு ஒரு மாத காலத்திற்குள் 20,000 ரூபாய் அபராதம் செலுத்துமாறு இயக்குநருக்கு உத்தரவிடப்பட்டுள்ளது. அலுவலக ரீதியான மோதல்களின் போது பயன்படுத்தப்படும் தவறான வார்த்தைகளை பாலியல் பலாத்கார முயற்சியாகவோ அல்லது பாலியல் தொல்லையாகவோ வகைப்படுத்த முடியாது என்பது இத்தீர்ப்பின் மூலம் தெளிவுபடுத்தப்பட்டுள்ளது.