உத்தரப் பிரதேசம் மாநிலம் பாராபங்கியில், முறையான அங்கீகாரம் இன்றி போலி மருத்துவமனை நடத்தி வந்த உரிமையாளர் மற்றும் அவரது மருமகன் இருவரும், யூடியூப் காணொளியைப் பார்த்துச் செய்த அறுவை சிகிச்சையில் ஏற்பட்ட குளறுபடியால், நோயாளிப் பெண் ஒருவர் உயிரிழந்த சம்பவம் பெரும் அதிர்ச்சியை ஏற்படுத்தியுள்ளது. முனிஷ்ரா ராவத் என்ற பெண், கல் தொடர்பான நோயால் அவதிப்பட்டு வந்தார்.

அவரது கணவர் தேபகதூர் ராவத், டிசம்பர் 5 அன்று, கோத்தியில் உள்ள ஸ்ரீ தாமோதர் ஒளஷ்தாலயா என்ற அந்த அங்கீகாரமற்ற மருத்துவமனைக்கு மனைவியை அழைத்துச் சென்றுள்ளார். அங்கே, கிளினிக் நடத்துநர் கியான் பிரகாஷ் மிஸ்ரா, வயிற்றில் உள்ள வலிக்குக் கற்களே காரணம் என்று கூறி, அறுவை சிகிச்சை செய்யுமாறு அறிவுறுத்தியுள்ளார்.

இந்தச் சிகிச்சைக்கு சுமார் ₹25,000 செலவாகும் என்று மதிப்பிடப்பட்ட நிலையில், முனிஷ்ரா ராவத்தின் கணவர் ₹20,000 தொகையை முன்பணமாகச் செலுத்தியுள்ளார். தேபகதூர் ராவத் அளித்த புகாரில், கியான் பிரகாஷ் மிஸ்ரா மது போதையில் இருந்ததாகவும், யூடியூப் காணொளியைப் பார்த்த பின்னரே அறுவை சிகிச்சையைத் தொடங்கியதாகவும் தெரிவித்துள்ளார்.

அறுவை சிகிச்சையின்போது, மிஸ்ரா தன் மனைவியின் வயிற்றில் ஆழமான கீறல்களை ஏற்படுத்தி, பல நரம்புகளைக் கத்தரித்ததாகவும், இதன் காரணமாக அடுத்த நாள் மாலையில் அவர் உயிரிழந்துவிட்டதாகவும் கணவர் குற்றம் சாட்டியுள்ளார். இந்தச் சிகிச்சைக்கு, ராய்பரேலியில் உள்ள ஒரு ஆயுர்வேத மருத்துவமனையில் ஊழியராகப் பணிபுரியும் மிஸ்ராவின் மருமகன் விவேக் குமார் மிஸ்ரா உதவியுள்ளார்.

பல ஆண்டுகளாக அரசு வேலையைப் பயன்படுத்தி சட்டவிரோதமாக இந்தச் சிகிச்சைகளைச் செய்து வந்துள்ளதாகக் காவல்துறை தெரிவித்துள்ளது. தற்போது மருத்துவமனைக்குச் சீல் வைக்கப்பட்டுள்ளது. கிளினிக் நடத்துநர் மற்றும் அவரது மருமகன் மீது, அலட்சியத்தால் மரணம் விளைவித்தல் மற்றும் எஸ்சி/எஸ்டி வன்கொடுமை தடுப்புச் சட்டம், 1989 ஆகியவற்றின் கீழ் வழக்குப் பதிவு செய்யப்பட்டுள்ளது. தலைமறைவான இருவரையும் கைது செய்யும் முயற்சிகள் தீவிரமாக நடைபெற்று வருகின்றன.