உத்தரப்பிரதேச மாநிலம் எட்டாவா மாவட்டத்தைச் சேர்ந்த 29 வயதான கவுஷல் சர்மா என்பவர், தனது தாயான யஷோதாவை கொடூரமாக கொலை செய்த அதிர்ச்சி சம்பவம் வெளிச்சத்திற்கு வந்துள்ளது. ஆக்ரா மாவட்டம் குரியாபுரா கிராமத்தைச் சேர்ந்த இவரது தாய் யஷோதா, 7 ஆண்டுகளுக்கு முன்பு தனது கணவர் சஞ்சய் சர்மாவை விட்டுவிட்டு, அதே கிராமத்தைச் சேர்ந்த ராம்நிவாஸ் சர்மாவை இரண்டாவது முறையாக திருமணம் செய்துகொண்டார்.

இச்சம்பவம் குடும்பத்தில் பெரும் விரோதத்தை ஏற்படுத்த, மகனான கவுஷல், தாயின் நடவடிக்கையை ‘குடும்பத்தின் மானத்தை குலைத்தது’ எனக் கண்டித்து, பழிவாங்க முடிவு செய்துள்ளார்.

அதன்படி, கடந்த ஜூலை 26 ஆம் தேதி தனது நண்பர்களான பாபி மற்றும் ராஜத் ஆகியோருடன் சேர்ந்து, ‘மருந்து வாங்க அழைத்துச் செல்ல வேண்டும்’ என சொல்லி தாயை ஸ்கார்பியோ காரில் அழைத்துச் சென்றார்.

சிறிது தூரம் சென்றபின், யஷோதாவை வாகனத்தில் இருந்து தள்ளி வீசியதும், அதே காரால் மோதிச் சாகடித்துள்ளனர். பின்னர், காயமடைந்த சடலத்தை புறவழியில் உள்ள கந்தியா பாலம் அருகே தூக்கி எறிந்துள்ளனர். இந்த நிகழ்வில், வாகனம் மற்றும் குற்றத்தில் பயன்படுத்தப்பட்ட மொபைல் போன்கள் ஆகியன பின்னர் பறிமுதல் செய்யப்பட்டுள்ளது.

ஜூலை 29 அன்று, யாருக்கும் அடையாளம் தெரியாத பெண்மணி ஒருவரின் சடலம் கந்தியா பாலம் அருகே கிடப்பதை போலீசார் கண்டுபிடித்தனர். விசாரணையில், அந்த சடலம் யஷோதா என்பதும், அவர் குரியாபுரா கிராமத்தைச் சேர்ந்தவரும், ஜெய்ப்பூர் போலீஸ் நிலைய எல்லைக்குட்பட்டவர்  என்பது தெரியவந்தது.

யஷோதாவின் தற்போதைய கணவர் போலீசில் புகார் அளித்ததைத் தொடர்ந்து, போலீசார் தீவிர விசாரணை மேற்கொண்டனர். முக்கிய ஆதாரமாக இருந்த சிசிடிவி காட்சிகளில், யஷோதா இறுதியாக தனது மகனுடன் காணப்பட்டிருந்ததை கண்டுபிடித்த போலீசார், கவுஷலை கைது செய்து விசாரணை நடத்தினர்.

விசாரணையின் போது கவுஷல் தனது குற்றத்தை ஒப்புக்கொண்டார். “தாயின் நடவடிக்கையால் சமூகத்தில் மானக்கேடு ஏற்பட்டது. இதனால் யாரும் என்னை மணக்க விரும்பவில்லை” என வாக்குமூலம் அளித்துள்ளார். இதற்கிடையில், பாபி மற்றும் ராஜத் ஆகிய இருவரும் கைது செய்யப்பட்டுள்ளனர்.

மேலும், ரவீந்திரா என்ற அவரது மாமாவும், சடலத்தை புதைக்க உதவி செய்ததாகக் கூறப்பட்டு கைது செய்யப்பட்டுள்ளார். இந்த சம்பவம், சமூக மரபுகளின் பெயரிலான கொடூர முடிவுகள் எப்படி ஒரு குடும்பத்தை அழித்து விடுகின்றன என்பதற்கான சோகமான எடுத்துக்காட்டாக விளங்குகிறது.