வரும் 2047ம் ஆண்டு வரை பிரதமர் வேட்பாளராக நரேந்திர மோடியே இருப்பார் என பாதுகாப்புத் துறை அமைச்சர் ராஜ்நாத் சிங் தெரிவித்துள்ளார்.

டெல்லியில் நடைபெற்ற நிகழ்ச்சியில் பேசிய அவர், “பாஜகவின் தவிர்க்க முடியாத தலைவர் பிரதமர் மோடி தான். 2024, 2029, 2034, 2039 மற்றும் 2044 தேர்தல்களிலும் அவர் தான் எங்களின் பிரதமர் வேட்பாளர். 2047ஆம் ஆண்டு நாட்டின் சுதந்திரம் 100 ஆண்டுகள் நிறைவை கொண்டாடும் விழாவுக்குப் பின்னரே அவர் ஓய்வு பெறுவார். அதற்குள் ‘விக்சித் பாரத்’ என்ற கனவு நிறைவேறும்” எனக் கூறினார்.

மேலும், “1980ம் ஆண்டு முதல் மோடியுடன் எனக்கு நெருங்கிய தொடர்பு உள்ளது. மக்களின் சிக்கலான பிரச்னைகளை எளிதில் தீர்க்கும் தலைவர் அவர். கடினமான நேரங்களில் தைரியமாக முடிவெடுக்கும் திறமை அவருக்கு உள்ளது.

உலக நாடுகளின் தலைவர்களும் கூட அவரிடம் ஆலோசனை பெறுகின்றனர். பிறந்த நாளன்று இவ்வளவு உலக தலைவர்களிடம் இருந்து வாழ்த்துகள் பெறும் ஒரே தலைவர் மோடிதான்.

பஹல்காம் தாக்குதல், ஆப்பரேஷன் சிந்தூர் போன்ற நடவடிக்கைகள் அவர் தீர்மானமான முடிவுகளை எடுக்கும் தலைவரென நிரூபிக்கின்றன” என ராஜ்நாத் சிங் விளக்கமாக தெரிவித்தார்.