இன்றைய அவசர உலகில் மன அழுத்தமும் பதற்றமும் பலருக்குப் பொதுவான பிரச்சனையாகிவிட்டது. ஆனால், நாம் அறியாமல் செய்யும் சில அன்றாடப் பழக்கங்களே நமது பதற்றத்தை மேலும் அதிகரிக்கச் செய்கின்றன என்பதைப் பலரும் உணர்வதில்லை. நமது கவலையை மெல்ல மெல்ல அதிகரிக்கும் மூன்று முக்கியப் பழக்கங்களைப் பற்றி இங்கு பார்ப்போம்.

முதலாவதாக, நமக்கு அசௌகரியம் தரும் கடினமான சூழ்நிலைகளைச் சந்திக்காமல் தவிர்ப்பது. இப்படித் தப்பிப்பது அப்போதைக்குச் சிறிது நிம்மதியைத் தந்தாலும், நமது மூளைக்கு தவறான சமிக்ஞையை அனுப்புகிறது. இதன் காரணமாக, அடுத்த முறை அதேபோன்ற ஒரு சூழ்நிலையை எதிர்கொள்ளும்போது பயமும் பதற்றமும் இருமடங்காக அதிகரிக்கிறது.

இரண்டாவதாக, பதற்றமாக இருக்கும்போது சோஷியல் மீடியாவில் நேரத்தை வீணடிப்பது, அளவுக்கு அதிகமாகச் சாப்பிடுவது அல்லது பொருட்கள் வாங்குவது போன்ற செயல்கள் மூலம் மனதைத் திசைதிருப்ப முயல்வது. இவை தற்காலிக ஆறுதலைத் தருமே தவிர, பிரச்சனைக்கான உண்மையான தீர்வைக் கொடுக்காது.

மூன்றாவதாக, எப்போதும் மற்றவர்களிடம் ஆறுதலும் அங்கீகாரமும் தேடுவது. சிறிய உடல்நலப் பிரச்சனைகளுக்குக்கூட கூகுளில் தேடிப் பயப்படுவதும், மற்றவர்களிடம் “நான் ஏதாவது தப்பு பண்ணிட்டேனா” எனக் கேட்டுக்கொண்டே இருப்பதும் சுய நம்பிக்கையைக் குறைத்து, சந்தேகத்தையே வளர்க்கும்.

எனவே, இதுபோன்ற சூழ்நிலைகளில் இருந்து ஓடி ஒளியாமல், அவற்றை தைரியமாக எதிர்கொள்ள மனதளவில் தயாராக வேண்டும். தற்காலிக நிம்மதியைத் தரும் இந்தப் பழக்கங்களை விட்டுவிட்டு, பிரச்சனைகளை நேரடியாக எதிர்கொள்வதே பதற்றத்தைக் குறைத்து தன்னம்பிக்கையை வளர்க்கும்.