20 ஓவர் உலகக் கோப்பை கிரிக்கெட் தொடரின் கடைசி மூன்று போட்டிகளில் அபாரமான ஆட்டத்தை வெளிப்படுத்தி இந்திய அணி கோப்பையை வெல்ல முக்கிய காரணமாக இருந்தவர் சஞ்சு சாம்சன். இந்தத் தொடரில் சிறப்பான பங்களிப்பை அளித்ததற்காகத் தொடர் நாயகன் விருதினையும் வென்று அவர் சாதனை படைத்துள்ளார்.

ஐபிஎல் கிரிக்கெட் போட்டிகளில் நீண்ட காலமாக ராஜஸ்தான் ராயல்ஸ் அணிக்காக விளையாடி வந்த சஞ்சு சாம்சன் இந்த ஆண்டு முதல் சென்னை சூப்பர் கிங்ஸ் அணிக்காக விளையாட உள்ளார். உலகக் கோப்பையில் காட்டிய அதே அதிரடி ஃபார்முடன் அவர் சிஎஸ்கே அணிக்குத் திரும்புவதால் ரசிகர்கள் மத்தியில் பெரும் எதிர்பார்ப்பு எழுந்துள்ளது.

சென்னை சூப்பர் கிங்ஸ் அணியுடன் இணைந்து தீவிரப் பயிற்சியில் ஈடுபடுவதற்காகச் சஞ்சு சாம்சன் தற்போது சென்னை வந்துள்ளார். இந்த நிலையில் அவர் அணியில் அணியப் போகும் ஜெர்சி எண் குறித்த விவரத்தை சிஎஸ்கே நிர்வாகம் அதிகாரப்பூர்வமாக வெளியிட்டுள்ளது. அதன்படி சஞ்சு சாம்சனுக்கு பதினொன்றாம் எண் கொண்ட ஜெர்சி வழங்கப்பட்டுள்ளது.

அவர் ஏற்கனவே ராஜஸ்தான் ராயல்ஸ் அணியில் விளையாடிய போதும் இதே எண்ணைப் பயன்படுத்தினார் என்பது குறிப்பிடத்தக்கது. இந்திய தேசிய அணியில் ஒன்பதாம் எண் கொண்ட ஜெர்சியில் விளையாடி வரும் நிலையில் சென்னை அணியில் தனது ராசி எண்ணுடனேயே அவர் களம் காண உள்ளார்.