2024ஆம் ஆண்டு நாடாளுமன்றத் தேர்தலுக்கு முன்னர், பிரதான எதிர்கட்சிகளின் ஒன்று சேர்க்கையால் உருவான “இந்தியா” கூட்டணியில் இருந்து, ஆம் ஆத்மி கட்சி தற்போது அதிகாரப்பூர்வமாக விலகுவதாக அறிவிப்பு வெளியிட்டுள்ளது.

இதனால் தேசிய அரசியலில் முக்கியமான மாற்றம் ஏற்பட்டுள்ளது. காங்கிரஸ், திமுக, மார்க்சிஸ்ட் உள்ளிட்ட முக்கிய கட்சிகள் ஒன்றிணைந்து உருவாக்கிய இந்த கூட்டணியின் நான்காவது கூட்டம் காணொளி வாயிலாக நடைபெற உள்ள நிலையில், அந்தக் கூட்டத்திற்கு முன்னதாகவே ஆம் ஆத்மியின் வெளியேற்றம் குறிப்பிடத்தக்கது.

ஆம் ஆத்மி கட்சி, கடந்த நாடாளுமன்றத் தேர்தலில் இந்தியா கூட்டணிக்குள் போட்டியிட்டு இருந்தாலும், ஹரியானா, குஜராத் மற்றும் டெல்லி உள்ளிட்ட மாநில சட்டமன்றத் தேர்தல்களில் தனிப்படையாகவே போட்டியிட்டு வந்தது குறிப்பிடத்தக்கது. இந்த மாநிலங்களில் காங்கிரசும் ஆம் ஆத்மியும் நேரடியாக மோதியதுடன், தேர்தல் பிரசாரங்கள் மற்றும் பரப்புரை கூட்டங்களில் கடுமையான கருத்துத் தாக்குதல்கள் பரிமாறப்பட்டிருந்தன.

இவ்வாறு நேர்மறை ஒத்துழைப்பு இல்லாத சூழ்நிலைகளும், தேர்தல் தோல்விகளும் இந்த பிரிவுக்கு காரணமாக இருக்கலாம் என்று அரசியல் வட்டாரங்கள் கருதுகின்றன.

“பாஜகவை தோற்கடிப்பதே ஒரே நோக்கம் என்ற அடிப்படையில் உருவான இந்த கூட்டணியில், நடைமுறை ஒத்துழைப்பு இல்லாத சூழலில் தொடர்வது சாத்தியமில்லை” எனக் கூறி, ஆம் ஆத்மி கட்சி வெளியிட்டுள்ள இந்த அறிவிப்பு தற்போது தேசிய அளவில் புதிய அரசியல் மாற்றங்கள்  உருவாக்கும் என்று எதிர்பார்க்கப்படுகிறது.

இது எதிர்க்கட்சிகளின் ஒன்றுபட்ட நடவடிக்கைக்கு ஒரு சவாலாக அமைந்துள்ளது. இனி வரும் நாட்களில் இதற்கான எதிரொலியும், மீதமுள்ள எதிர்க்கட்சிகள் எவ்வாறு பதிலளிக்கின்றன என்பதும் அரசியலின் புதிய வட்டத்தை தொடக்கவைக்கப்போகிறது.