திமுக கூட்டணியில் இருந்து விலகி பாஜக – அதிமுக அணிக்கு செல்லவிருக்கின்றனர் என்ற வதந்திகள் கடந்த சில நாட்களாகவே பரவி வந்தன. இதில் மதிமுகவின் நிலை குறித்து கேள்விகள் எழுந்தன. குறிப்பாக, மதிமுக பொதுச்செயலாளர் வைகோ பாஜகவுடன் மறைமுக பேச்சுவார்த்தை நடத்தி வருகிறார் என்றும், தேமுதிக திமுக கூட்டணியில் இணைந்தால் மதிமுக வெளியேறும் என்றும் சில ஊடகங்கள் தகவல்கள் வெளியிட்டன.

இந்த நிலையில்,  தமிழக முதல்வர் மு.க.ஸ்டாலினை நேரில் சந்தித்த வைகோ, சந்திப்பு முடிந்து ஊடகங்களிடம் பேசிய போது, “திமுக கூட்டணியில் இருந்து விலகுவதாக கூறும் தகவல்கள் முற்றிலும் தவறானவை. மதிமுக, திமுக கூட்டணியில் தொடர்ந்து இருக்கப்போகிறது. பாஜக உடன் எவ்வித தொடர்பும், பேச்சுவார்த்தையும் நடத்தவில்லை. கடந்த 40 ஆண்டுகளாக இந்துத்துவ அமைப்புகளுக்கு எதிராகப் பேசியுள்ளேன். எதிர்காலத்திலும் அவர்களுடன் எந்த நேரத்திலும் கூட்டணி வைக்க முடியாது” என திட்டவட்டமாக தெரிவித்தார்.

மேலும், “பாஜக – அதிமுக அணிக்கு மதிமுக செல்வது போன்ற அபாண்டமான வதந்திகளை பரப்பும் செயல் ஒழிக்கப்பட வேண்டும். தேமுதிக திமுக கூட்டணியில் வந்தாலும், அதற்கான முடிவுகளை கூட்டணித் தலைவராக ஸ்டாலின் தீர்மானிப்பார். ஆனால் மதிமுக கூட்டணியில் இருந்து விலகும் எண்ணம் எங்களிடம் இல்லை” என வைகோ உறுதியளித்தார்.

இது குறித்து அரசியல் வட்டாரங்கள் தெரிவிப்பதாவது, வைகோவின் இந்தச் செயல் திமுக கூட்டணியின் ஒருமைப்பாட்டை வலுப்படுத்தும் வகையில் இருக்கின்றது. மேலும், எதிர்கால தேர்தல்களை முன்னிட்டு எந்தவித குழப்பத்தையும் தவிர்க்கும் நோக்கத்துடன் விளக்கமளித்திருக்கலாம் என கூறப்படுகிறது.