கள்ளக்குறிச்சி மாவட்டம் உளுந்தூர்பேட்டை மற்றும் அதன் அருகிலுள்ள பகுதிகளில் நிகழ்ந்துள்ள அடுத்தடுத்த மரணங்கள் அப்பகுதியில் பெரும் சோகத்தையும் அதிர்ச்சியையும் ஏற்படுத்தியுள்ளது. காதலி உயிரிழந்த சோகம் தாங்காமல் காதலனும் தற்கொலை செய்து கொண்ட சம்பவம் அப்பகுதி மக்களைக் கண்ணீரில் ஆழ்த்தியுள்ளது.

கள்ளக்குறிச்சி மாவட்டம் உளுந்தூர்பேட்டை அருகே உள்ள பாலி கிராமத்தைச் சேர்ந்தவர் தனக்கண்ணு மகன் கவிதாஸ் (26). ஐ.டி.ஐ. படித்துவிட்டு டிராக்டர் ஓட்டி வந்த இவரும், அதே பகுதியைச் சேர்ந்த சங்கர் என்பவரின் மகள் கிருஷ்ணவேணி (23) என்பவரும் காதலித்து வந்ததாகக் கூறப்படுகிறது. பி.எஸ்சி., பி.எட்., படித்தவரான கிருஷ்ணவேணி வீட்டில் இருந்து வந்துள்ளார். இந்நிலையில், கடந்த 23-ஆம் தேதி வீட்டை விட்டு வெளியே சென்ற கிருஷ்ணவேணி திடீரென மாயமானார். இதனால் அதிர்ச்சியடைந்த அவரது தாய் சாந்தி காவல் நிலையத்தில் புகாரளித்தார்.

இந்நிலையில்  உறவினர் ஒருவரின் கிணற்றில் கிருஷ்ணவேணி பிணமாக மிதப்பதாக அந்த வழியாகச் சென்றவர்கள் பார்த்துப் பதறிப்போய் தகவல் தெரிவித்தனர். உடனே சம்பவ இடத்திற்கு விரைந்த தீயணைப்பு வீரர்களும் போலீசாரும்  அவரது உடலை மீட்டனர். உடலைக் கண்டு அவரது குடும்பத்தினர் கதறி அழுத காட்சி காண்போரை உருக்கமடையச் செய்தது. தொடர்ந்து, பிரேதப் பரிசோதனைக்காக உளுந்தூர்பேட்டை அரசு மருத்துவமனைக்கு உடல் அனுப்பி வைக்கப்பட்டது.

காதலியின் திடீர் மறைவை ஏற்றுக்கொள்ள முடியாத கவிதாஸ் கடும் மனவேதனை அடைந்துள்ளார். இதனால் அதிர்ச்சியடைந்த அவர், அங்கிருந்து கடலூர் மாவட்டம்  காட்டுப்பரூர் கிராமத்திற்குச் சென்றுள்ளார். அங்குள்ள ஒரு விவசாய நிலத்தில் சோகத்துடன் காணப்பட்ட அவர், திடீரென நேற்று காலை அங்கிருந்த மரத்தில் தூக்கிட்டுத் தற்கொலை செய்து கொண்டார்.

தகவல் அறிந்த காவல்துறையினர் விரைந்து சென்று உடலைக் கைப்பற்றி அரசு மருத்துவமனைக்குப் பிரேதப் பரிசோதனைக்காக அனுப்பி வைத்தனர். இதுகுறித்து காவல்துறையினர் வழக்குப்பதிவு செய்து விசாரணை நடத்தி வருகின்றனர். காதலுக்கு ஏற்பட்ட எதிர்ப்பு காரணமாக இந்த விபரீத முடிவு எடுக்கப்பட்டதா அல்லது வேறு ஏதேனும் காரணமா என்பது குறித்துப் பல்வேறு கோணங்களில் தீவிர விசாரணை நடந்து வருகிறது. அடுத்தடுத்து நிகழ்ந்த இந்த மரணங்கள் அப்பகுதி மக்களிடையே பெரும் சோகத்தை ஏற்படுத்தியுள்ளது.