மேற்கு வங்க மாநிலம் கொல்கத்தாவில் பெண்களுக்கு எதிரான குற்றங்கள் தொடர்ந்து அதிகரித்து வருவது பெரும் அதிர்ச்சியை ஏற்படுத்தியுள்ளது. பானித்ரோனி பகுதியைச் சேர்ந்த பெண் ஒருவர், கடந்த 7 ஆண்டுகளாகச் சமூக வலைதள நண்பரால் பாலியல் வன்கொடுமைக்கு உள்ளாக்கப்பட்டு, மிரட்டலுக்கு ஆளானதாகக் கொடுத்துள்ள புகார் காவல்துறை வட்டாரத்தில் பரபரப்பை ஏற்படுத்தியுள்ளது.

அந்தப் பெண் தனது புகாரில், “சமூக வலைதளத்தில் அறிமுகமான நண்பருடன் சுற்றுலா சென்றபோது, ஹோட்டல் அறையில் வைத்து என்னை வன்கொடுமை செய்து, அதை வீடியோவாகப் படம் பிடித்தான். அந்த வீடியோவை சமூக வலைதளத்தில் வெளியிட்டுவிடுவேன் என்று மிரட்டி, கடந்த பல ஆண்டுகளாகத் தொடர்ந்து என்னைச் சுரண்டினான்,” என்று உருக்கமாகத் தெரிவித்துள்ளார்.

இது குறித்து காவல் நிலையத்தில் ‘ஜீரோ எஃப்.ஐ.ஆர்’ பதிவு செய்யப்பட்டு, தற்போது பானித்ரோனி காவல்துறைக்கு வழக்கு மாற்றப்பட்டுள்ளது. தீவிர விசாரணை நடைபெற்று வரும் நிலையில், இதுவரை எவரும் கைது செய்யப்படவில்லை.

இதற்கிடையில், பரூய்பூரில் 11 வயதுச் சிறுமி ஒருத்தி கடத்தப்பட்டு, கூட்டுப் பாலியல் வன்கொடுமை செய்யப்பட்டு, கொடூரமாகக் கொல்லப்பட்ட சம்பவம் மாநிலத்தையே உலுக்கியுள்ளது. கடந்த ஜூலை 4-ம் தேதி காணாமல் போன அந்தச் சிறுமியின் உடல், மறுநாள் அருகிலுள்ள குளத்திலிருந்து மீட்கப்பட்டது.

இச்சம்பவத்தில் ஆனந்த் சர்தார், பிரபாஸ் மண்டல் மற்றும் திவாகர் சர்தார் ஆகிய மூவர் கைது செய்யப்பட்டு, அவர்கள் மீது கொலை, கூட்டுப் பாலியல் வன்கொடுமை உள்ளிட்ட பிரிவுகளின் கீழ் வழக்கு பதிவு செய்யப்பட்டுள்ளது.

இதில் மிக முக்கிய குற்றவாளி, சம்பவ இடத்தைச் சீரமைக்கும் விசாரணையின்போது காவலரிடமிருந்து துப்பாக்கியைப் பறித்துச் சுட்டுத் தப்பிக்க முயன்றதால், காவல்துறையின் பதிலடித் தாக்குதலில் என்கவுன்டர் செய்யப்பட்டார்.