குஜராத் மாநிலம் அகமதாபாத்தைச் சேர்ந்த தொழிலதிபர் ஒருவர், தனது மனைவியின் நடத்தையில் சந்தேகம் அடைந்து, வீட்டிலேயே ரகசிய ஒலிப்பதிவுக் கருவியைப் பொருத்தி ஆதாரங்களைத் திரட்டிய சம்பவம் பெரும் பரபரப்பை ஏற்படுத்தியுள்ளது.

ஜிம்முக்குச் செல்லும் தனது மனைவி, அங்கு அறிமுகமான ஒருவருடன் நெருக்கமாகப் பழகுவதாக அந்தத் தொழிலதிபர் குற்றம் சாட்டியுள்ளார். தன் கணவர் இல்லாத நேரத்தில் அந்த நபர் வீட்டிற்கு வருவதை அறிந்த அவர், தனது சந்தேகத்தை உறுதிப்படுத்தத் திட்டமிட்டார்.

அக்கம்பக்கத்தினரும், குழந்தைகளும் இதுகுறித்துத் தன்னிடம் தெரிவித்த தகவல்களை வைத்து, யாருக்கும் தெரியாமல் வீட்டில் ரகசியமாக ஆடியோ ரெக்கார்டிங் கருவியைப் பொருத்தினார். அதில் பதிவான உரையாடல்கள், தனது மனைவி அந்த நபரைக் காதலிப்பதை உறுதிப்படுத்தியதாக அவர் கூறியுள்ளார்.

மேலும், மனைவியைப் பின்தொடர்ந்து சென்று, அந்த நபர் மற்றும் தனது மனைவி காரில் ஒன்றாக இருப்பதையும் நேரில் பார்த்ததாக அவர் குறிப்பிட்டுள்ளார். இந்தத் தகவல்களுடன் சைபர் கிரைம் போலீஸாரை நாடியும் நடவடிக்கை எடுக்கப்படாததால், அவர் நீதிமன்றத்தை அணுகியுள்ளார்.

இதற்கிடையே, தம்பதியினரின் கூட்டு வங்கி லாக்கரில் உள்ள விலை உயர்ந்த பொருட்களை மனைவி கையாடல் செய்யக்கூடும் என்று அஞ்சிய அவர், அந்த லாக்கரை முடக்க நீதிமன்றத்தில் உத்தரவு பெற்றுள்ளார்.

இதையறிந்த மனைவியின் கள்ளக்காதலன், தன்னை மிரட்டுவதாகவும், ஆடியோ பதிவுகளை அழித்துவிட்டு, பணப் பிரச்சினையைச் சரிசெய்யக் கோரி ரூ.1 கோடி கேட்டு மிரட்டுவதாகவும் அவர் போலீஸில் புகார் அளித்துள்ளார். இந்தச் சம்பவம் குறித்து விரிவான விசாரணை நடத்த சைபர் கிரைம் துறைக்கு நீதிமன்றம் உத்தரவிட்டுள்ளது.