உத்தரப் பிரதேச மாநிலம் ஜான்சி மாவட்டத்தில் உள்ள பங்கரி பங்ரா கிராமத்தில், அடிப்படை வசதிகள் எந்த லட்சணத்தில் இருக்கிறது என்பதைத் தோலுரித்துக் காட்டும் விதமாக ஒரு அவலச் சம்பவம் அரங்கேறியுள்ளது. கிராமத்துச் சுடுகாட்டில் முறையான நிழற்குடை இல்லாத காரணத்தால், கொட்டும் மழையில் தார்ப்பாய் கட்டிக் கொண்டு ஒரு இளைஞரின் உடலை கிராம மக்கள் இறுதிச்சடங்கு செய்ய வேண்டிய கட்டாயத்திற்குத் தள்ளப்பட்டுள்ளனர். இந்த நெஞ்சை உலுக்கும் சம்பவம், அந்தப் பகுதியின் மோசமான கிராமப்புற உள்கட்டமைப்பை வெளிச்சத்திற்கு கொண்டு வந்துள்ளது.

பங்கரி பங்ரா கிராமத்தைச் சேர்ந்த ஓம்பிரகாஷ் அகிர்வார் (40) என்ற நபர் கடந்த சில வருடங்களாகப் புற்றுநோயால் பாதிக்கப்பட்டு, சிகிச்சை பலனின்றி அண்மையில் உயிரிழந்தார். ஏற்கனவே நீண்ட நாள் நோய் பாதிப்பு காரணமாக, அந்தக் குடும்பம் கடுமையான பொருளாதார மற்றும் மன ரீதியான நெருக்கடியில் தவித்து வந்தது. இந்த நிலையில், உயிரிழந்த ஓம்பிரகாஷின் இறுதி ஊர்வலம் கிராமத்துச் சுடுகாட்டை அடைந்தபோது, எதிர்பாராத விதமாகப் பலத்த மழை பெய்யத் தொடங்கியது. ஆனால், அந்தச் சுடுகாட்டில் மழையில் இருந்து ஒதுங்குவதற்கோ அல்லது சடலத்தை வைப்பதற்கோ எந்தவொரு நிழற்குடையோ, அமரும் இடமோ இல்லை.

துக்கத்திலிருந்த குடும்பத்தினருக்கும் கிராம மக்களுக்கும் இந்த அவலநிலை பெரும் துயரத்தை ஏற்படுத்தியது. வேறு வழியின்றி, கிராம மக்கள் அனைவரும் ஒன்று சேர்ந்து ஒரு தார்ப்பாயை கயிறுகளால் கட்டி, மழை நீர் சடலத்தின் மீது விழாதவாறு தடுத்து, கடும் சிரமத்திற்கு மத்தியில் இறுதிச்சடங்கு முறைகளை ஒருவழியாகச் செய்து முடித்தனர். உயிரிழந்த ஓம்பிரகாஷ் அகிர்வார் சொந்தமாக நிலம் எதுவும் இல்லாத ஒரு ஏழைத் தொழிலாளி ஆவார். தற்போது அவர் தன் 8 வயது மகனையும், இரண்டு மகள்களையும், மனைவியையும் தவிக்க விட்டுச் சென்றுள்ளார். குடும்பத்தின் ஒரே வாழ்வாதாரமாக இருந்த நபர் மறைந்ததால், அந்தக் குடும்பம் தற்போது நடுத்தெருவுக்கு வந்துள்ள நிலை கிராம மக்களிடையே பெரும் சோகத்தை ஏற்படுத்தியுள்ளது.

இதுகுறித்து உள்ளூர்வாசியான சஞ்சய் குஷ்வாஹா கூறுகையில், “ஓம்பிரகாஷ் அகிர்வார் பொருளாதார ரீதியாக மிகவும் நலிவடைந்தவர். தொடர்ந்து பெய்த மழையின் போது சுடுகாட்டில் அடிப்படை வசதிகள் இல்லாததால், தார்ப்பாய் கட்டி இறுதிச்சடங்கு செய்ய வேண்டியதாயிற்று. ஒவ்வொரு மனிதனின் இறுதிப் பயணமும் மரியாதைக்குரியதாக இருக்க வேண்டும். ஆனால் அடிப்படை வசதிகள் இல்லாத இந்த அவலம் ஒட்டுமொத்த கிராமத்தையே வெட்கித் தலைகுனிய வைத்துள்ளது” என்று வேதனையுடன் தெரிவித்தார். மேலும், மாவட்ட நிர்வாகம் உடனடியாகத் தலையிட்டுச் சுடுகாட்டில் நிழற்குடை மற்றும் மக்கள் அமருவதற்கான வசதிகளைச் செய்து தர வேண்டும் என்றும் கிராம மக்கள் கோரிக்கை விடுத்துள்ளனர்.