“மருந்துக்கு பதிலா ஃபார்மலின் இன்ஜெக்ஷன்!”.. எய்ம்ஸ் மருத்துவமனையில் 3 வயது புற்றுநோய் குழந்தை துடிதுடித்து மரணம்.. நர்சுகளின் அலட்சியத்தால் நேர்ந்த கொடூரம்..!!!

மத்தியப் பிரதேச மாநிலம் போபாலில் உள்ள எய்ம்ஸ் (AIIMS Bhopal) மருத்துவமனையில், இரத்தப் புற்றுநோயுடன் (Blood Cancer) போராடி வந்த மூன்று வயது பச்சிளம் குழந்தைக்கு, நர்சுகளின் கடுமையான அலட்சியம் காரணமாக மருந்துக்கு பதிலாக உடல்களைப் பதப்படுத்தப் பயன்படும் ‘ஃபார்மலின்’ (Formalin) என்ற நச்சுத்தன்மை வாய்ந்த ரசாயனத்தை ஊசி மூலம் செலுத்தியதால் அக்குழந்தை பரிதாபமாகத் துடிதுடித்து உயிரிழந்த நெஞ்சை பதறவைக்கும் சம்பவம் தற்பொழுது வெளியாகி நாடு முழுவதும் பெரும் அதிர்ச்சியையும் கொந்தளிப்பையும் ஏற்படுத்தியுள்ளது.

சாகர் மாவட்டத்தைச் சேர்ந்த சார்த்தக் யாதவ் என்ற 3 வயது சிறுவன், கடந்த 2025 டிசம்பர் மாதம் போபால் எய்ம்ஸ் மருத்துவமனையின் குழந்தை நலப் பிரிவில் அனுமதிக்கப்பட்டிருந்தான். சம்பவத்தன்று காலையில் சிறுவனின் ஐவி (IV) குளுக்கோஸ் குழாயில் அடைப்பு ஏற்பட்டபோது, அங்கே பணியில் இருந்த மதுபாலா சர்மா என்ற நர்சிங் அதிகாரி, வார்டில் ‘F’ என எழுதப்பட்டிருந்த ஒரு ஊசியை எடுத்து எவ்வித சோதனையும் செய்யாமல் சிறுவனின் ஐவி பாட்டிலில் செலுத்தியுள்ளார்.

இதைப் பார்த்துக் பதறிப்போன குழந்தையின் தந்தை சித்தார்த் யாதவ், “அதைச் செய்ய வேண்டாம்” என மூன்று முறை தடுத்தபோது, “நானா இங்க டாக்டர், இல்ல நீங்களா?” என்று அந்த நர்ஸ் தடித்த வார்த்தைகளால் எகிறுHeader பேசியுள்ளார். நச்சு ரசாயனம் உடலில் ஏறிய அடுத்த சில நிமிடங்களிலேயே சிறுவன் மயங்கி விழுந்து, தீவிர சிகிச்சைப் பிரிவில் (PICU) அனுமதிக்கப்பட்டுச் சிபிஆர் (CPR) சிகிச்சை அளிக்கப்பட்டும் பலனின்றி பரிதாபமாக உயிரிழந்தான்.

இந்தத் துயரச் சம்பவத்திற்குப் பிறகு, மருத்துவமனை நிர்வாகம் நடத்திய உள்விசாரணையில், பயாப்ஸி மாதிரிகளைப் பாதுகாக்க வார்டில் வைக்கப்பட்டிருந்த ஆபத்தான ஃபார்மலின் திரவத்தை அஜாக்கிரதையாக வைத்திருந்த நர்ஸ் அனுகா குஜராத்தி மற்றும் அதனைச் சிறுவனுக்குச் செலுத்திய நர்ஸ் மதுபாலா சர்மா ஆகிய இருவரின் அலட்சியமே காரணம் என உறுதி செய்யப்பட்டு அவர்கள் சஸ்பெண்ட் செய்யப்பட்டனர்.

தற்பொழுது பாக்ஸேவானியா (Bagsewania) போலீஸார் இந்த இரண்டு நர்சுகள் மீதும் மரணத்தை விளைவித்தல் மற்றும் ஆபத்தான ரசாயனத்தை அலட்சியமாகக் கையாளுதல் ஆகிய பிரிவுகளின் கீழ் வழக்குப் பதிவு செய்து தீவிரமாகத் தேடி வரும் நிலையில், எய்ம்ஸ் மருத்துவமனையில் அரங்கேறிய இந்த மருத்துவக் கொடூரச் செய்தி தற்பொழுது சோசியல் மீடியாவில் அசுர வேகத்தில் ட்ரெண்டாகி வருகிறது.