வியட்நாமிய மின்சார வாகன நிறுவனமான வின்ஃபாஸ்ட், இந்தியாவில் கார்களை விற்பனை செய்வதோடு மட்டுமல்லாமல், தனது துணை நிறுவனமான ‘கிரீன் எஸ்எம்’ மூலம் மின்சார டாக்சி சேவையிலும் தடம் பதிக்கத் தயாராகி வருகிறது.

ஆரம்பக் கட்டமாக டெல்லி-என்சிஆர் பகுதியில் சுமார் 1,000 மின்சார டாக்சிகளுடன் தொடங்கப்படும் இந்தச் சேவை, 2026-ஆம் ஆண்டின் இறுதிக்குள் 15,000 வாகனங்களாக உயர்த்தப்பட்டு, பின்னர் பெங்களூரு, ஹைதராபாத் போன்ற முக்கிய நகரங்களுக்கும் விரிவுபடுத்தப்பட உள்ளது.

ஓலா, ஊபர் போன்ற நிறுவனங்களுக்குப் போட்டியாக அமையவுள்ள இந்தச் சேவையில், இந்நிறுவனம் தனது புதிய மின்சார எம்பிவி ரக வாகனமான வின்ஃபாஸ்ட் லிமோ கிரீனைப் பயன்படுத்தத் திட்டமிட்டுள்ளது.

வழக்கமான டாக்சி நிறுவனங்களைப் போல இல்லாமல், வாகனப் பராமரிப்பு, ஓட்டுநர்கள் மற்றும் சார்ஜிங் கட்டமைப்பு என அனைத்தையும் இந்த நிறுவனமே நேரடியாகக் கையாளும் மாடலில் இது செயல்படவுள்ளது.

இதன் மூலம் வாடிக்கையாளர்களுக்குச் சிறந்த, பாதுகாப்பான பயண அனுபவத்தை வழங்குவதோடு, தினசரி ஆயிரக்கணக்கான மக்கள் தங்கள் கார்களில் பயணிப்பதால் இந்தியச் சந்தையில் வின்ஃபாஸ்ட் பிராண்ட் மிக விரைவாகப் பொதுமக்களின் நம்பிக்கையைப் பெறும் என்று எதிர்பார்க்கப்படுகிறது.

இந்த அதிரடி நுழைவு இந்தியாவின் மின்சார வாகனச் சந்தையில் பெரும் போட்டியை உருவாக்குவதுடன், சுற்றுச்சூழலுக்கு உகந்த பசுமைப் போக்குவரத்தை நோக்கிய முக்கிய நகர்வாகவும் பார்க்கப்படுகிறது.