நெல்லை மாவட்டம் மாஞ்சோலை தேயிலைத் தோட்ட தொழிலாளர்களின் வாழ்வாதாரம் மற்றும் நிலப் பிரச்சனை சம்பந்தமான முக்கிய வழக்கு இன்று உச்சநீதிமன்றத்தில் விசாரணைக்கு வந்தது. இந்த விசாரணையின் போது, தமிழ்நாடு அரசு சார்பில் வாதிடுவதற்கு அரசு தரப்பு வழக்கறிஞர்கள் யாரும் நீதிமன்றத்தில் ஆஜராகவில்லை. இதனால் உச்சநீதிமன்ற நீதிபதிகள் கடும் அதிருப்தியும் கோபமும் அடைந்தனர்.

தமிழ்நாட்டில் புதிய அரசு (தவெக அரசு) அமைந்து இத்தனை நாட்களாகியும், இன்னும் உச்சநீதிமன்றத்தில் மாநில அரசுக்கான அரசு தரப்பு வழக்கறிஞர்களை ஏன் முறையாக நியமிக்காமல் இருக்கிறீர்கள் என்று நீதிபதிகள் தமிழக அரசுக்குக் காரசாரமான கேள்விகளை எழுப்பினர். அரசு வழக்கறிஞர்கள் நியமனத்தில் நிலவும் முடக்கத்திற்குத் தனது கண்டனத்தைப் பதிவு செய்த நீதிபதிகள், தமிழக அரசுக்கு அதிரடி எச்சரிக்கை ஒன்றை விடுத்துள்ளனர்.

“அடுத்த முறை இந்த வழக்கு விசாரணைக்கு வரும்போதும் தமிழ்நாடு அரசு சார்பில் வழக்கறிஞர்கள் ஆஜராகவில்லை என்றால், முந்தைய ஆட்சி காலத்தில் (திமுக ஆட்சியில்) பொறுப்பில் இருந்த அரசு வழக்கறிஞர்களையே மீண்டும் நீதிமன்றத்திற்கு நேரில் அழைத்து, இந்த வழக்கின் விசாரணையை நடத்த வேண்டி இருக்கும்” என்று நீதிபதிகள் தவெக அரசுக்குக் கடுமையான எச்சரிக்கை விடுத்து வழக்கை ஒத்திவைத்தனர்.