அசாம் மாநிலம் ஜோர்ஹாட் அருகே உள்ள ஒரு குக்கிராமத்தில் நடந்த சம்பவம் இப்போது நாடு முழுவதும் பெரும் பேசுபொருளாக மாறியுள்ளது. ஜிட்டு கோகோய் என்பவர் தனது வீட்டுப் பின்புறம் குடிநீருக்காக ஆழ்துளைக் கிணறு தோண்டியபோது, தண்ணீர் வருவதற்குப் பதிலாகத் தீப்பிடித்து எரியக்கூடிய இயற்கை எரிவாயு பீறிட்டு வந்துள்ளது.

கடந்த 14 மாதங்களாக எந்தவிதப் பாதுகாப்பு உபகரணங்களும் இன்றி, வெறும் ஒரு குழாய் மூலமாகவே அந்த எரிவாயுவைப் பயன்படுத்தி அந்த குடும்பத்தினர் சமையல் செய்து வருகின்றனர். சிலிண்டர் விலை உயர்ந்து வரும் வேளையில், தங்களுக்குக் கிடைத்த ‘இலவச வரப்பிரசாதம்’ என்று அவர்கள் இதனைப் பெருமையுடன் கூறி வருகின்றனர்.

​இருப்பினும், இந்த ‘இலவச எரிவாயு’ எந்த நேரத்திலும் வெடிக்கக் காத்திருக்கும் ஒரு ஆபத்தான குண்டாகவே பார்க்கப்படுகிறது. முறையான அழுத்தக் கட்டுப்பாட்டுக் கருவிகளோ அல்லது பாதுகாப்பு வால்வுகளோ இல்லாமல், ஒரு குழாயின் வழியாக நேரடியாகத் தீயைப் பற்ற வைத்துச் சமைப்பது பெரும் விபத்துக்கு வழிவகுக்கலாம்.

நிலத்தடி எரிவாயு கசிவு என்பது அந்த ஒரு குடும்பத்திற்கு மட்டுமல்லாது, ஒட்டுமொத்த கிராமத்திற்கே பேராபத்தை விளைவிக்கக்கூடியது. உடனடியாகச் சம்பந்தப்பட்ட அதிகாரிகள் இதில் தலையிட்டு, அறிவியல் பூர்வமான ஆய்வுகளை மேற்கொண்டு உரியப் பாதுகாப்பு நடவடிக்கைகளை எடுக்க வேண்டும் என்பதே சமூக ஆர்வலர்களின் கோரிக்கையாக உள்ளது.