உத்தரப்பிரதேச மாநிலம் அசம்கரில் நடந்த ஒரு கோரமான சாலை விபத்து, அங்கிருந்த சிசிடிவி கேமராவில் பதிவாகி பார்ப்பவர்களை நிலைகுலைய வைத்துள்ளது. ஜியான்பூர் கோட்வாலி பகுதியில் உள்ள கோகா சாவ் திர்ஹா அருகே, அதிவேகமாக வந்த ஸ்கார்பியோ கார் ஒன்று, சாலையோரம் கடை வைத்திருந்த ஒரு சிறு வியாபாரி மீது பயங்கரமாக மோதியது. இதில் ஹரேந்திர சோன்கர் என்ற அந்த இளைஞர் சம்பவ இடத்திலேயே துடிதுடிக்க உயிரிழந்தார். கைவண்டியில் சோலே விற்றுப் பிழைப்பு நடத்தி வந்த அந்த இளைஞரின் உயிர், கண்ணிமைக்கும் நேரத்தில் பறிபோனது பெரும் சோகத்தை ஏற்படுத்தியுள்ளது.

​இந்த விபத்தை ஏற்படுத்திய காரை ஓட்டி வந்த பாரத் சிங் என்பவர், தனது குடும்பத்துடன் ஒரு மொட்டை அடிக்கும் விழாவிற்குச் சென்றுவிட்டுத் திரும்பிக் கொண்டிருந்தபோது கார் கட்டுப்பாட்டை இழந்ததாகத் தெரிகிறது. விபத்து நடந்தவுடன் ஆத்திரமடைந்த கிராம மக்கள் மற்றும் உயிரிழந்தவரின் உறவினர்கள் அந்தப் பகுதியில் சாலை மறியலில் ஈடுபட்டனர். சுமார் ஒரு மணி நேரப் போராட்டத்திற்குப் பிறகு, போலீசார் வந்து உரிய நடவடிக்கை எடுப்பதாக உறுதி அளித்ததைத் தொடர்ந்து கலைந்து சென்றனர். தற்போது கார் ஓட்டுநர் கைது செய்யப்பட்டுள்ள நிலையில், இந்த விபத்து குறித்து போலீசார் தீவிர விசாரணை நடத்தி வருகின்றனர்.