ஈரோடு கிழக்கு சட்டமன்றத் தொகுதிக்குட்பட்ட 20-வது வார்டு பகுதியில் அடிப்படை வசதிகள் ஏதும் செய்து தரப்படவில்லை எனக்கூறி, அப்பகுதி மக்கள் அரசியல் கட்சிகளுக்கு எதிராக அதிரடிப் போராட்டத்தைக் கையில் எடுத்துள்ளனர். சாலை வசதி, குடிநீர் மற்றும் சாக்கடை போன்ற அத்தியாவசியத் தேவைகளை நிறைவேற்றக் கோரி பலமுறை அரசாங்கத்திடம் மனுக்கள் அளித்தும், இதுவரை எவ்வித நடவடிக்கையும் எடுக்கப்படவில்லை என மக்கள் குற்றம் சாட்டுகின்றனர்.

​இதனால் ஆத்திரமடைந்த மக்கள், “வாக்குறுதிகளை நிறைவேற்றாமல் வாக்கு கேட்டு வராதீர்கள்” எனப் பெரிய அளவில் பேனர் அடித்துத் தங்கள் வீதிகளில் வைத்துள்ளனர். தேர்தல் வரும்போது மட்டும் தேடி வரும் அரசியல்வாதிகள், அதன் பிறகு தங்கள் பகுதியைக் கண்டுகொள்வதே இல்லை என அவர்கள் வேதனை தெரிவிக்கின்றனர். 2026 சட்டமன்றத் தேர்தல் நெருங்கி வரும் வேளையில், ஈரோட்டில் அரங்கேறியுள்ள இந்த ‘பேனர்’ எதிர்ப்பு சம்பவம் திமுக கூட்டணி மற்றும் எதிர்க்கட்சிகள் இடையே பெரும் பரபரப்பை ஏற்படுத்தியுள்ளது.