2026 சட்டமன்றத் தேர்தலை முன்னிட்டு திமுக கூட்டணியில் அங்கம் வகிக்கும் மக்கள் நீதி மய்யத்தின் தலைவர் கமல்ஹாசன், தொகுதிப் பங்கீடு குறித்து இன்று மிக முக்கியமான கருத்துக்களைப் பகிர்ந்து கொண்டார். செய்தியாளர்கள் “திமுகவிடம் எத்தனை தொகுதிகளைக் கேட்பீர்கள்?” என்று எழுப்பிய கேள்விக்கு, நேரடியாக எண்ணிக்கையைக் குறிப்பிடாமல் மிகவும் சாதுர்யமாகப் பதிலளித்தார். “எத்தனை தொகுதிகள் என்று இப்போது சொல்ல முடியாது, ஆனால் உரிய நேரத்தில் நாங்கள் அதை வெளியிடுவோம்” என்று அவர் கூறினார்.

​மேலும் அவர் பேசுகையில், “தற்போது எங்களுக்கு முக்கியமான விஷயம் கூட்டணியில் நிலவும் ஒற்றுமையும், எங்களின் நோக்கமும்தான். அது எங்களுக்கு மிகவும் தெளிவாக உள்ளது. அந்த இலக்கை நோக்கியே நாங்கள் நகர்கிறோம்” என்று தெரிவித்தார். தொகுதி எண்ணிக்கையை விடக் கூட்டணியின் பலமே முக்கியம் என்று கமல் பேசியிருப்பது, திமுக தலைமையுடனான இணக்கமான உறவைக் காட்டுவதாக அரசியல் நோக்கர்கள் கருதுகின்றனர். இருப்பினும், கமல்ஹாசனுக்கு எத்தனை தொகுதிகள் ஒதுக்கப்படும் என்பது மநீம தொண்டர்களிடையே இன்னும் பெரிய சஸ்பென்ஸாகவே நீடிக்கிறது.