நாடாளுமன்ற மாநிலங்களவையில் 2026 ஆம் ஆண்டுக்கான மத்திய பட்ஜெட் மீதான விவாதத்திற்குப் பதிலளித்து மத்திய நிதி அமைச்சர் நிர்மலா சீதாராமன் உரையாற்றினார். அப்போது குறுக்கிட்டுப் பேசிய சமாஜ்வாடி கட்சி உறுப்பினர் ஜெயா பச்சன் நிதி அமைச்சரை ஒரு சிறந்த கதை சொல்லி என்றும் அவரது பதில்கள் சிறந்த பொழுதுபோக்காக இருப்பதாகவும் கிண்டலாகக் குறிப்பிட்டார்.

தொடர்ந்து பேசிய அவர் பொழுதுபோக்குத் துறையினரே அதிக வரி செலுத்துவதாகவும் ஆனால் உயர்ந்து வரும் சினிமா டிக்கெட் விலையால் அத்துறை பெரும் பாதிப்பைச் சந்தித்து வருவதாகவும் கவலை தெரிவித்தார்.

இதற்குப் பதிலளித்த நிதி அமைச்சர் நிர்மலா சீதாராமன் சினிமா டிக்கெட் கட்டணம் மற்றும் பொழுதுபோக்கு வரி போன்றவை மாநில அரசுகளின் அதிகார வரம்பிற்கு உட்பட்டவை என்பதால் இது குறித்து மத்திய அரசிடம் கேள்வி எழுப்புவதில் அர்த்தமில்லை என்று தெளிவுபடுத்தினார்.

திரைத்துறைக்கு பட்ஜெட்டில் உரிய முக்கியத்துவம் அளிக்கப்படவில்லை என்ற குற்றச்சாட்டை மறுத்த நிதி அமைச்சர் அனிமேஷன் மற்றும் விஷுவல் எபெக்ட்ஸ் போன்ற துறைகளுக்கு அரசு தொடர்ந்து ஆதரவு அளித்து வருவதாகக் கூறினார்.

இத்துறையை நாட்டின் வளர்ச்சிக் காரணியாகக் கருதுவதால் நாடு முழுவதும் உள்ள பதினைந்தாயிரம் பள்ளிகளில் டிஜிட்டல் ஊடக உள்ளடக்கங்களை உருவாக்க ஆய்வகங்கள் நிறுவப்படும் என்று அவர் அறிவித்தார். இதன் மூலம் 2030 ஆம் ஆண்டுக்குள் இருபது லட்சம் தொழில் வல்லுநர்களை உருவாக்குவதே அரசின் இலக்கு என்றும் அவர் குறிப்பிட்டார்.

அனிமேஷன் மற்றும் படைப்பாற்றல் சார்ந்த பொருளாதாரத்தை வலுப்படுத்த மும்பையில் உள்ள இந்தியக் கிரியேட்டிவ் டெக்னாலஜிஸ் நிறுவனம் மூலம் இத்திட்டம் செயல்படுத்தப்படும் என்றும் நிதி அமைச்சர் தனது உரையில் உறுதிபடத் தெரிவித்தார்.