கேரள மாநிலம் எர்ணாகுளம் மாவட்டத்தில் விளையாடிக் கொண்டிருந்த இரண்டு வயது சிறுவன், எதிர்பாராத விதமாக ஐந்து சிறிய மின்கலன்களை விழுங்கிய சம்பவம் பெரும் பதற்றத்தை ஏற்படுத்தியது. எர்ணாகுளம் பகுதியைச் சேர்ந்த இந்தச் சிறுவன், வீட்டில் விளையாடிக் கொண்டிருந்தபோது அங்கிருந்த மின்னணு சாதனங்களில் பயன்படுத்தப்படும் பட்டன் வடிவிலான மின்கலன்களை எடுத்து வாயில் போட்டு விழுங்கியுள்ளார்.

சிறிது நேரத்திலேயே சிறுவனுக்கு உடல்நலக்குறைவு ஏற்பட்டதைக் கண்டு அதிர்ச்சியடைந்த பெற்றோர், உடனடியாக அவரை எர்ணாகுளம் அரசு மருத்துவக் கல்லூரி மருத்துவமனைக்குக் கொண்டு சென்றனர். அங்கு சிறுவனைப் பரிசோதித்த மருத்துவர்கள், அவசர சிகிச்சைப் பிரிவில் அனுமதித்து எக்ஸ்ரே எடுத்துப் பார்த்தபோது, சிறுவனின் வயிற்றில் ஐந்து மின்கலன்கள் இருப்பது உறுதி செய்யப்பட்டது.

மின்கலன்கள் வயிற்றில் நீண்ட நேரம் இருந்தால் அதிலிருந்து கசியும் வேதிப்பொருட்கள் குடல் மற்றும் உட்புற உறுப்புகளைப் பாதித்து உயிருக்கே ஆபத்தாக முடியும் என்பதால், மருத்துவர்கள் உடனடியாக அறுவை சிகிச்சை இன்றி எண்டோஸ்கோபி முறையில் அவற்றை அகற்றத் தீர்மானித்தனர்.

மருத்துவக் குழுவினர் சுமார் ஒரு மணி நேரம் போராடி சிறுவனின் வயிற்றில் இருந்த ஐந்து மின்கலன்களையும் பாதுகாப்பாக வெளியே எடுத்தனர். துரிதமாகச் செயல்பட்டு சிறுவனின் உயிரைக் காப்பாற்றிய மருத்துவர்களைப் பெற்றோரும் பொதுமக்களும் பாராட்டி வருகின்றனர். அதே வேளையில், வீடுகளில் உள்ள சிறிய மின்னணு சாதனங்கள் மற்றும் மின்கலன்களைக் குழந்தைகள் கையில் கிடைக்காத வண்ணம் பாதுகாப்பாக வைக்க வேண்டும் என்று மருத்துவர்கள் எச்சரிக்கை விடுத்துள்ளனர்.