தமிழகத்தில் தி.மு.க. தலைமையிலான கூட்டணி கட்டுக்கோப்பாகவும் உறுதியாகவும் இருப்பதாகவும், எதிர்க்கட்சிகள் ஒன்றிணைய முடியாமல் சிதறிக் கிடப்பதாகவும் அவர் குறிப்பிட்டுள்ளார். சிதறிக் கிடக்கும் எதிர்க்கட்சிகள் தி.மு.க. கூட்டணியை வீழ்த்துவோம் என்று கூறுவது நகைப்புக்குரியது எனச் சுட்டிக்காட்டிய அவர், சமூக நீதி, பெரியார் மற்றும் அம்பேத்கர் வழியிலான கருத்தியல் அரசியலே தங்களுக்கு முதன்மையானது என்றும், கூட்டணி என்பது இரண்டாம்பட்சம்தான் என்றும் திட்டவட்டமாகத் தெரிவித்தார். மேலும், ஆசிரியர்கள் மற்றும் தூய்மைப் பணியாளர்களின் கோரிக்கைகளை முதல்வர் கனிவோடு பரிசீலிக்க வேண்டும் என்ற வேண்டுகோளையும் அவர் அன்போடு முன்வைத்துள்ளார்.
மதவாத சக்திகள் தமிழகத்தில் காலூன்ற அ.தி.மு.க போன்ற கட்சிகள் துணை போவதாகக் குற்றம் சாட்டிய அவர், சனாதன சக்திகளுக்கு ஆதரவாகச் செயல்படுபவர்களை மக்கள் அடையாளம் காண வேண்டும் என்று கேட்டுக்கொண்டார். மறைந்த முன்னாள் முதல்வர் கலைஞர் அவர்கள் பா.ஜனதாவுடன் கூட்டணி வைத்திருந்த காலத்தில்கூடத் தனது கொள்கைகளில் உறுதியாக இருந்தார் என்பதை நினைவுகூர்ந்த அவர், தற்போதுள்ள சில கட்சிகள் கருத்தியல் ரீதியாக அடிமையாகிப் போனதைச் சுட்டிக்காட்டினார். குறிப்பாக, சிறுபான்மையினர் மீதான தாக்குதல்கள் குறித்துப் புதிய அரசியல் சக்திகள் மௌனம் காப்பது ஏன் என்ற கேள்வியையும் அவர் முன்வைத்துள்ளார்.
