கேரள மாநிலம் கோழிக்கோடு மாவட்டம் செறுவன்னூர் பகுதியை சேர்ந்த வர்ஷா (38), கடந்த 2022-ம் ஆண்டு கோழிக்கோட்டில் உள்ள ஒரு தனியார் நிதி நிறுவனத்தில் 226 கிராம் நகையை அடகு வைத்ததாக கூறி, அதற்கெதிராக ரூ.9 லட்சம் பணத்தை பெற்றுக்கொண்டார்.

ஆனால் பின்னர் அந்த நகைகள் போலியானவை என்று தணிக்கையின் போது தெரிய வந்தது. இந்த சம்பவம் பரபரப்பை ஏற்படுத்த, நிறுவனத்தினர் வர்ஷாவிடம் இதுகுறித்து விளக்கம் கேட்க, தான் தற்கொலை செய்து கொள்வதாக கடிதம் எழுதி விட்டு ஸ்கூட்டரை பாலம் அருகே விட்டு தப்பி ஓடினார்.

தற்போதைய சூழலில், வர்ஷா தலைமறைவான நிலையில் இருந்ததால், நிதி நிறுவன உரிமையாளர்கள் போலீசில் புகார் பதிவு செய்தனர். கோழிக்கோடு போலீசார் சைபர் கிரைம் பிரிவுடன் இணைந்து தொடர் விசாரணை நடத்தி வந்தனர்.

சில ஆண்டுகளுக்குப் பிறகு, வர்ஷா வாட்ஸ்அப்பில் தனது குடும்பத்தினருடன் தொடர்பு கொண்டதன் அடிப்படையில், போலீசார் அவரது இருப்பிடத்தை கண்டறிந்தனர். தொடர்ந்து நடத்தப்பட்ட விசாரணையில், அவர் திருச்சூரில் உள்ள ஒரு தனியார் நிறுவனத்தில் வேலை செய்து வந்தது தெரியவந்தது.

இதையடுத்து, சம்பவ இடத்துக்கு விரைந்த போலீசார் வர்ஷாவை கைது செய்து கோழிக்கோட்டில் உள்ள நீதிமன்றத்தில் ஆஜர்படுத்தினர். பின்னர் அவரை நீதிமன்ற உத்தரவில் சிறையில் அடைத்தனர். 3 ஆண்டுகளாக தலைமறைவாக இருந்த பெண் இவ்வாறு பிடிபட்டது அந்த மாவட்டத்தில் பேச்சு பொருளாக மாறியுள்ளது.

போலி நகை மூலம் பெரிய அளவில் பண மோசடி செய்து தப்பிச் சென்றும், இறுதியில் சட்டத்தின் வலை வீச்சில் சிக்கியதோடு, நிதி நிறுவனங்களின் பாதுகாப்பு முறைகள் மீதும் கேள்விகள் எழுந்துள்ளன.